लोकमत न्यूज नेटवर्क
कोल्हापूर : जिल्ह्यात शनिवारी सकाळपासूनच पावसाच्या जोरदार सरी कोसळत राहिल्या. धरणक्षेत्रातही जोरदार पाऊस असल्याने राधानगरी धरणाचे दोन स्वयंचलित दरवाजे खुले झाले आहेत. त्यातून प्रतिसेकंद ४२०० घनफूट पाण्याचा विसर्ग सुरू आहे.
गेल्या दोन-तीन दिवसांपासून जिल्ह्यात पावसाचा जोर काहीसा वाढला आहे. अधूनमधून सरी येत असल्या तरी त्या जोरदार असल्याने सगळीकडे पाणीच पाणी करतात. शनिवारी सकाळी दीड-दोन तास एकसारख्या सरी कोसळत राहिल्या. दिवसभर पाऊस राहिला, धरणक्षेत्रातही जोरदार पाऊस असल्याने विसर्ग वाढला आहे. दुपारी दोन वाजता राधानगरी धरणाचे ३ व ६ क्रमांकाचे दरवाजे खुले झाले आहेत. त्यातून प्रतिसेकंद ४२०० घनफूट पाण्याचा विसर्ग सुरू असल्याने ‘भोगावती’च्या पातळीत वाढ होत आहे. पंचगंगेची पातळी २२ फूट ४ इंचांवर असून, १४ बंधारे पाण्याखाली आहेत. ‘तुळशी’तून ५०७, ‘वारणा’तून २३२३ घनफूट पाण्याचा विसर्ग सुरू आहे. शाहूवाडी, गगनबावडा व चंदगड तालुक्यांत तुलनेने अधिक पाऊस आहे.
फोटो ओळी : जिल्ह्यात शनिवारी पावसाची रिपरिप कायम राहिली. राधानगरीतून विसर्ग वाढल्याने पंचगंगा नदीच्या पाणीपातळीत वाढ होत आहे. (फाेटो-११०९२०२१-कोल-रेन) (छाया- आदित्य वेल्हाळ)