कोल्हापूर : पूर्ववैमनस्यातून दोघा सख्ख्या भावांवर बॅट व दगडाने हल्ला करून त्यांना गंभीर जखमी करण्याचा प्रकार सदरबाजार परिसरात घडला. संजय विनोद भंडारे व निखिल विनोद भंडारे (दोघेही रा. दाभाडे गल्ली, सदरबाजार) अशी जखमींची नावे आहेत. ही घटना रविवारी घडली. याबाबत सोमवारी शाहुपूरी पोलीस ठाण्यात पाच तरुणांवर गुन्हा दाखल झाला आहे.
पोलिसांनी दिलेली माहिती अशी की, सदर बाजारमध्ये पूर्ववैमनस्यातून संजय भंडारे याला काही तरुणांनी लाथाबुक्क्यांनी, बॅटने बेदम मारहाण केली. त्याला जिवे ठार मारण्याच्या उद्देशाने त्याच्या डोक्यात बॅट मारून गंभीर जखमी केले. याचा जाब विचारण्यासाठी गेलेल्या त्याचा भाऊ निखिल भंडारे यालाही दगडाने व बॅटने मारहाण करण्यात आली. या हल्ल्यात दोघे भंडारे बंधू गंभीर जखमी झाले. त्यांच्यावर सरकारी रुग्णालयात उपचार सुरू आहेत. याबाबत योगेश बाजीराव भंडारे याने सोमवारी शाहूपुरी पोलीस ठाण्यात तक्रार दिली. त्यानुसार पोलिसांनी सोनू सूर्यवंशी, अनिकेत अमर सूर्यवंशी, गब्बर अमर सूर्यवंशी, अक्षय रामा लोखंडे, सुहासिनी अमर सूर्यवंशी (सर्व रा. एकता तरुण मंडळ शेजारी, सदरबाजार) यांच्यावर गुन्हा नोंदवला आहे.