परिवर्तनशीलता शोधण्याचा प्रयत्न करा

तारा भवाळकर यांचे आवाहन : कोल्हापुरात ‘अंनिस’च्या राज्य कार्यकारिणीच्या बैठकीला प्रारंभ

कोल्हापूर : परिवर्तनशीलता शोधण्याचा प्रयत्न करा. त्यासह चिंतन करून समाजाचे मन समजून घ्या, असे आवाहन ज्येष्ठ साहित्यिका डॉ. तारा भवाळकर यांनी शुक्रवारी येथे केले.येथे महाराष्ट्र अंधश्रद्धा निर्मूलन समितीच्या राज्य कार्यकारिणी बैठकीच्या उद्घाटन प्रसंगी त्या बोलत होत्या. महालक्ष्मी हॉलमधील या कार्यक्रमास ‘अंनिस’चे राज्य कार्याध्यक्ष अविनाश पाटील, हमीद दाभोलकर उपस्थित होते. ज्येष्ठ कामगार नेते गोविंद पानसरे यांच्या प्रथम स्मृतिदिनानिमित्त ‘अंनिस’च्या राज्य कार्यकारिणीची बैठक व अधिवेशन आयोजित केले आहे.डॉ. भवाळकर म्हणाल्या, आपल्या देशात विविधता आहे. जो पूजापाठ करतो तो कर्मठच असतो असे नाही. त्यामुळे याकडे ‘अंनिस’च्या कार्यकर्त्यांनी योग्य पद्धतीने पाहावे. समाजाचे अंतर्बाह्य परीक्षण, वाचन करावे, त्यातून बारकावे समजतील. विविध घटनांबाबत विचार, वाचन करून आपल्या पद्धतीने परीक्षण करून ते समाजाच्या प्रयोगशाळेत तपासून पाहावे. संतपरंपरेतील समाज वैज्ञानिक भूमिका समजून घ्यावी. सद्य:स्थितीत आध्यात्मिक लोकशाही गरजेची आहे. मी आणि माझ्याभोवतीचा समाज यातील अनुबंध म्हणजे अध्यात्म असे मी मानते. आध्यात्मिक लोकशाहीद्वारे एकमेकांची मते समजून घ्यावीत.पाटील म्हणाले, समविचारी पक्षांशी एकजूट करून आपली भूमिका निभावण्याची गरज आहे. राजकीय, सामाजिक पातळीवरील बदलांकडे ‘अंनिस’च्या कार्यकर्त्यांनी अभ्यासपूर्वक लक्ष द्यावे. यावेळी कॉ. पानसरे, डॉ. नरेंद्र दाभोलकर, डॉ. एम. एम. कलबुर्गी यांना अभिवादन करण्यात आले. यावेळी ‘अंनिस’चे कोल्हापूर शहर कार्याध्यक्ष सुजाता म्हेत्रे, जिल्हाध्यक्ष प्रकाश भोईटे, उमेश सूर्यवंशी, के. डी. खुर्द, धनाजीराव जाधव, कृष्णात कोरे, संजय बनसोडे, विनायक साबळे, सीमा पाटील, आर. एस. कुलकर्णी, आदींसह राज्यातील ‘अंनिस’चे कार्यकर्ते उपस्थित होते. जिल्हा सचिव रमेश वडणगेकर यांनी सूत्रसंचालन केले. जिल्हा कार्याध्यक्ष सुनील स्वामी यांनी आभार मानले. यावेळी संघटन बांधणी, वैज्ञानिक जाणिवा याबाबत चर्चा झाली.