हा अपघात रविवारी दुपारी ११.३० च्या सुमारास पांगिरे (ता. भुदरगड) गावाशेजारी पेट्रोलपंपानजीक घडला. गडहिंग्लजहून कोरीवकाम केलेली दगडे गारगोटी येथील मुळे महाराज मंदिर बांधकामसाठी घेऊन ट्रक गारगोटीकडे जात होता. ट्रक पांगिरे गावाशेजारी पेट्रोल पंपानजीक आला असता अचानक ट्रकचा पुढील चालकाच्या बाजूचा टायर फुटला . त्यामुळे ट्रक सरळ समोरून येणाऱ्या दुचाकीला धडकला. त्यामुळे दुचाकीवरील युवराज परीट (३५,रा. ठिकपुर्ली, ता.राधानगरी) हे जागीच ठार झाले तर नंदकुमार गायकवाड (४२, रा.माजगाव, ता. राधानगरी) यांना जखमी अवस्थेत गारगोटी ग्रामीण रुग्णालयात दाखल केले होते. पण त्यांचा तेथे उपचारादरम्यान मृत्यू झाला.
हा अपघात इतका भीषण होता की ट्रक सरळ अंगावरून गेल्याने दुचाकीस्वार गंभीर अवस्थेत पडले होते. दुचाकीवरील दोघेजण गावाहून कामानिमित्त गडहिंग्लजला चालले होते. तर ट्रक बाजूच्या शेतात पलटी होऊन सुमारे दोन लाखाचे नुकसान झाले असल्याचे सांगण्यात आले. ट्रकचालक बाजीराव गायकवाड (रा.गारगोटी) हे जखमी झाले आहेत. त्यांना गारगोटी ग्रामीण रुग्णालयात दाखल केले आहे. याबाबत भुदरगड पोलिसांत नोंद झाली असून पोलिसांनी पंचनामा केला आहे.
फोटो पांगिरे (ता .भुदरगड ) येथे झालेल्या भीषण अपघातात ट्रक व दुचाकीचा चक्काचूर झाला.