विजय कदम
कणेरी : कोरोनाची साखळी तोडण्यासाठी प्रशासनासह सर्वचजण निकाराची लढाई लढत असले तरी कोरोनाचा अटकाव म्हणावा तितका कमी होताना दिसत नाही. कणेरीसह गोकुळ शिरगावमध्ये सध्या कोरोना रुग्ण झपाट्याने वाढू लागल्याने ग्रामस्थांपुढे नवे आव्हान उभे ठाकले आहे. गेल्या आठवड्याभरात या दोन्ही गावांमध्ये कोरोना रुग्णांच्या संख्येत लक्षणीय वाढ झाली असून ही गावे हॉटस्पॉट बनत आहेत. गोकुळ शिरगावमध्ये जानेवारीपासून आजअखेर ७४ रुग्ण सापडले असून त्यापैकी ३८ रुग्ण बरे झाले आहेत. यातील एकाचा मृत्यू झाला असून ३५ रुग्ण उपचार घेत आहेत. गोकुळ शिरगावमध्ये कोरोनाच्या पार्श्वभूमीवर ग्रामपंचायत व आरोग्य विभागाने सारी व इलीचे रुग्ण शोधण्याचे काम सुरू केले आहे. कणेरी आरोग्य केंद्रांतर्गत गोकुळ शिरगावमध्ये एकदाच कोरोना प्रतिबंध लसीकरण करण्यात आले आहे. गावची लोकसंख्या पाहता येथे लसीकरण वाढविण्याची गरज आहे. कणेरी प्राथमिक आरोग्य केंद्रांतर्गत असलेल्या कणेरी, कणेरीवाडी गावात कोरोनाचे रुग्ण वाढले असून कणेरीत जानेवारीपासून आजअखेर ४१ रुग्ण सापडले आहेत. त्यापैकी २६ रुग्ण बरे झाले असून ३ रुग्णांचा कोरोनाने मृत्यू झाला आहे, तर १२ रुग्ण उपचार घेत आहेत. कणेरीवाडीत जानेवारीपासून आजअखेर ४८ रुग्ण आढळले असून त्यापैकी २८ रुग्ण घरी परतले आहेत. यात २ रुग्णांचा मृत्यू झाला आहे, तर १८ रुग्ण उपचार घेत आहेत.
कोट : कणेरी प्राथमिक केंद्रावर १०४३९ नागरिकांनी लस घेतली आहे. सुरुवातीस कोरोना लसीकरणाबाबत जनजागृती कमी झाल्याने लाभार्थ्यांची संख्या कमी होती. मात्र, आता लोकांच्या रांगा लागत आहेत.
-बी. एस. मस्के,
वैद्यकीय अधिकारी प्राथमिक आरोग्य केंद्र,
कणेरी.
चौकट : पहाटेपासूनच रांगा
सुरुवातीला लसीकरणाला थंडा प्रतिसाद मिळाला होता, पण कोरोनाचा उद्रेक सुरू झाला तशी लोकांनी लसीकरणासाठी गर्दी केली. त्यातच १८ वर्षांवरील सर्वांना लसीकरण करण्याचा निर्णय शासनाने जाहीर केल्यानंतर लसीचा तुटवडा निर्माण झाला. मुळातच लस पुरवठा कमी असताना असा निर्णय जाहीर केल्याने मोठी गर्दी होऊन कणेरी प्राथमिक आरोग्य केंद्रावर लांबच लांब रांगा दिसत आहेत. पहाटेपासून नागरिक कणेरी प्राथमिक आरोग्य केंद्राच्या आवारात येऊन बसतात. लस नाही मिळाली तर वादाचे प्रकार होत आहेत.