कोल्हापूर : ‘गोकुळ’साठी उमेदवारी अर्ज दाखल करण्यास सुरू झाल्यानंतर हालचाली वेगावल्या आहेत. आज, शुक्रवारी कोल्हापुरात ग्रामविकास मंत्री हसन मुश्रीफ व पालकमंत्री सतेज पाटील हे विरोधी शाहू आघाडीची बैठक घेणार आहेत. या बैठकीत संभाव्य पॅनलची रचना व पुढील रणनीतीची बऱ्यापैकी निश्चिती होणार आहे.
मंत्री मुश्रीफ गुरुवारी रात्री उशिरा कोल्हापुरात दाखल झाले. सोमवार (दि. २९) पर्यंत ते कोल्हापुरात असल्याने यानिमित्ताने बैठकांचा आता खऱ्या अर्थाने धडाका सुरू होणार आहे. एक एप्रिल ही अर्ज दाखल करण्याची अंतिम मुदत आहे. तत्पूर्वी उमेदवारांची नावे निश्चित करावी लागणार आहे. विरोधी आघाडीकडे नेते व इच्छुकांची रांग लागल्याने जागावाटपाचा मोठा तिढा निर्माण झाला आहे. कॉंग्रेस, राष्ट्रवादी, शिवसेना, शेकाप, स्वाभिमानीसह अन्य छोटे मोठे पक्ष या आघाडीत सहभागी असल्याने पॅनेल करताना माेठी कसरत करावी लागणार आहे.
या पार्श्वभूमीवर आज, गुरुवारी होणाऱ्या बैठकीत यावर चर्चा होणार आहे. शिवसेनेचे माजी आमदार सत्यजित पाटील सरुडकर व आमदार प्रकाश आबिटकर यांच्या संभाव्य भूमिकांच्या बाबतीतही चर्चा होणार आहे. शासकीय विश्रामगृहावर बसण्याचे नियोजन आहे; पण ऐनवेळी यात बदल होऊ शकतो असेही सांगण्यात आले.