शिरोळ : चोरीप्रकरणी टाकवडे (ता. शिरोळ) येथील तिघांना शिरोळ पोलिसांनी गजाआड केले. अवघ्या चोवीस तासांच्या आत डेअरी फार्ममध्ये झालेल्या चोरीचा छडा पथकाने लावला. चोरीस गेलेली दुधाची भुकटी, गुन्ह्यात वापरलेली रिक्षा असा ८७ हजार रुपयांचा मुद्देमाल जप्त करण्यात आला. आकाश काशिनाथ दबडे (वय १९), तनवीर शकील शेख (वय २१) व समीर फकरुद्दीन नदाफ (वय २०) अशी संशयितांची नावे आहेत.
पोलिसांनी सांगितले की, संशयित आरोपींनी गोडावूनमधून दुधाची भुकटी चोरून नेली होती. खब-यामार्फत मिळालेल्या माहितीनंतर शिरोळ पोलिसांनी सापळा रचून तिघा संशयित आरोपींना जांभळी परिसरात ताब्यात घेतले. त्यांच्याकडे कसून चौकशी केली असता गुन्ह्याची कबुली दिली. मुद्देमालही जप्त करण्यात आला. ही कारवाई सहायक पोलीस निरीक्षक शिवानंद कुंभार यांच्या मार्गदर्शनाखाली पोलीस उपनिरीक्षक नवनाथ सुळ, ज्ञानेश्वर सानप, हनुमंत माळी, सुनील पाटील, ताहीर मुल्ला, गजानन कोष्टी, अभिजित परब, युवराज खरात यांच्या पथकाने केली. संशयितांकडून आणखी गुन्हे उघडकीस येण्याची शक्यता आहे.
फोटो - २९०६२०२१-जेएवाय-०५
फोटो ओळ - चोरीप्रकरणी शिरोळ पोलिसांनी तिघा संशयितांना अटक केली.