इचलकरंजी : हातामध्ये लायटर बंदूक घेऊन व्हिडीओ करणे व आव्हानात्मक मजकूर ठेवून दहशत निर्माण करण्याच्या उद्देशाने सोशल मीडियावर व्हायरल केल्याप्रकरणी तिघांना शिवाजीनगर पोलिसांनी अटक केली. अक्षय प्रकाश पाटील (वय २६, रा. भोनेमाळ, सध्या रा. कोल्हापूर नाका), गौरव शरद मरडे (२५, रा. रुई, ता. हातकणंगले) व ओमकार सचिन लोले (२०, रा. खोतवाडी, ता. हातकणंगले) अशी त्यांची नावे आहेत.
याबाबत अधिक माहिती अशी, अक्षय व गौरव हे एका सिनेमातील दृश्याप्रमाणे हातामध्ये बंदूक (लायटर) घेत गुन्हेगारी संभाषण असलेला चिथावणीखोर व्हिडीओ इन्स्टाग्रामवर स्टोरी व व्हॉटस्-अ‍ॅपवर स्टेटस् ठेवले होते. ही माहिती पोलिसांना मिळताच या दोघांचा शोध घेऊन शुक्रवारी पहाटे त्यांना अटक केली. त्याचबरोबर व्हिडीओ तयार केल्याप्रकरणी ओमकार लोले यालाही अटक केली. असे स्टेटस् अथवा मेसेज व्हायरल करणाऱ्यांवर कडक कारवाई करण्याचे आदेश अप्पर पोलीस अधीक्षक जयश्री गायकवाड यांनी दिले असून, त्यानुसार पोलिसांची सोशल मीडियावर नजर आहे.