यड्राव : शिरोळ व हातकणंगले तालुक्यातील सर्व कामगार कुटुंबांच्या आरोग्याचे प्रश्न मार्गी लागावेत, तसेच त्यांना त्वरित व मोफत उपचार व्हावेत या दृष्टिकोनातून महाराष्ट्र राज्य कामगार विमा सोसायटी अंतर्गत या आरोग्य केंद्राची उभारणी केली आहे. भविष्यात येथे दहा आयसीयू बेड व दहा जनरल बेडची सुविधा उपलब्ध करण्यात येणार असून, परिसरातील पंधरा हजारांहून अधिक कामगार व त्यांच्या कुटुंबीयांना याचा लाभ मिळणार आहे, असे प्रतिपादन आरोग्य राज्यमंत्री डॉ. राजेंद्र पाटील-यड्रावकर यांनी केले.
यड्राव (ता. शिरोळ) येथील पार्वती औद्योगिक वसाहतीमध्ये उभारण्यात आलेल्या कामगार विमा दवाखान्याच्या उद्घाटनप्रसंगी ते बोलत होते. या वेळी विज्ञानंद मुंडे, संजय पाटील-यड्रावकर प्रमुख उपस्थित होते.
मंत्री यड्रावकर म्हणाले की, कामगार कुटुंबांना आरोग्य सेवा-सुविधा मिळवून देण्याच्या उद्देशाने आग्रही राहून ही सुविधा सुरू केली आहे. या दवाखान्यास इचलकरंजी परिसरातील अद्यावत सुविधा असलेल्या दवाखाने संलग्न करण्यात आले आहेत. त्यामुळे उपचारही अत्यल्प दरात, मोफत होतील. त्याचबरोबर आजारी रजा, मॅटर्निटी रजा, अपघात उपचार अशा अनेक सुविधा या अंतर्गत मिळणार आहेत. केंद्राच्या सुविधा कामगारांच्या घरापर्यंत कशा पोहोचतील यासाठी आम्ही सर्वजण प्रयत्न करीत आहोत.
या वेळी शामराव कुलकर्णी, तुषार सुलतानपुरे यांनी मनोगत व्यक्त केले. याप्रसंगी वसाहतीचे उपाध्यक्ष महावीर खवाटे, अनिल बागणे, आदित्य पाटील-यड्रावकर, सत्येंद्रराजे नाईक-निंबाळकर, अशोकराव माने, सुरेश रेडेकर, सरपंच कुणालसिंह नाईक-निंबाळकर, उपसरपंच प्राची हिंगे, राहुल खंजिरे, ताज्जोद्दिन तहसीलदार, प्रतीक चौगुले, अभिजित पाटील उपस्थित होते.
फोटो - ३१०५२०२१-जेएवाय-०२
फोटो ओळ - यड्राव (ता. शिरोळ) येथे पार्वती इंडस्ट्रीयल इस्टेटमध्ये आरोग्य केंद्राचे उद्घाटन आरोग्य राज्यमंत्री डॉ. राजेंद्र पाटील-यड्रावकर यांच्याहस्ते झाले. यावेळी विद्यानंद मुंडे, संजय पाटील-यड्रावकर, अशोकराव माने, सत्येंद्रराजे नाईक-निंबाळकर, प्रकाश अकिवाटे, कुणालसिंह नाईक-निंबाळकर, प्राची हिंगे उपस्थित होते.