शिक्षकांचा पत्ताच नाही... प्राचार्यही प्रभारी...

आवश्यक साधनेही नाहीत : राधानगरी औद्योगिक प्रशिक्षण संस्थेतील अवस्था

संजय पारकर-राधानगरी -दीर्घ संघर्षातून येथील शासकीय औद्योगिक प्रशिक्षण संस्थेसाठी अद्ययावत इमारत झाली. मुलांची संख्याही पुरेशी आहे. मात्र, त्यांना शिकविण्यासाठी शिक्षकच नाहीत. निधीअभावी आवश्यक साधनेही उपलब्ध नाहीत. त्यामुळे संस्था म्हणजे ‘असून अडचण, नसून खोळंबा’, अशी स्थिती आहे. अनेक वर्षांपासून येथील प्राचार्यच प्रभारी आहेत. त्यांचेही याबाबत दुर्लक्ष होत असल्याचे समोर येत आहे.वीस वर्षांपूर्वी मिनी औद्योगिक प्रशिक्षक संस्था सुरू झाली. तालुका तेथे आयटीआय या धोरणानुसार मागील काही वर्षांपासून पूर्ण प्रशिक्षक संस्थेत तिचे रूपांतर झाले. प्रारंभी खासगी जागेत वर्ग भरत होते. दहा वर्षांपूर्वी नवीन इमारत मंजूर झाली. जागाही उपलब्ध झाली, पण तेथे जागा रस्त्याबाबत अडचणी निर्माण झाल्यामुळे न्यायालयीन दावे, प्रतिदावे, आंदोलने, अशा प्रक्रियेतून चार-पाच वर्ष इमारत रेंगाळली होती. अडथळ्याची शर्यत पूर्ण करून इमारत पूर्ण झाल्याने विद्यार्थ्यांची सोय होईल, असे अपेक्षित होते. तालुक्यातील विद्यार्थ्यांचा व्यावसायिक शिक्षक होण्यासठी ओघ वाढल्याने दोन सत्रात वर्ग सुरू करण्यात आले आहेत.दुसऱ्या सत्रातील वर्गांना शिल्प निदेशक, वीजतंत्री, यांत्रिक इलेक्ट्रॉनिक्स, फिटासंधाता, गणित, चित्रकला या विषयांसाठी कायमस्वरूपी शिक्षक असल्याने कंत्राटी स्वरूपात नेमणुका केल्या जातात. मात्र, या शिक्षकांना नोव्हेंबर २०१३ पासून मानधन देण्यात आलेले नाही. त्यामुळे यावर्षीच्या सत्रापासून ही पदेच रिक्त आहेत. अर्धे वर्ष संपूनही विद्यार्थ्यांना या विषयांचा गंधही नाही. अंतिम परीक्षासाठी सर्वच औद्योगिक प्रशिक्षक संस्थेमध्ये वजावट गुण पद्धत लागू केली आहे. याचा मोठा फटका विद्यार्थ्यांना बसणार आहे.येथे नेमणुकीस असलेले प्राचार्य बागेवाडी हे अनेक वर्षापासून प्रभारीच आहेत. ते क्वचितच संस्थेत येतात. येथील बराचसा कारभार येथील एक निदेशक पाहतात. त्यामुळे येथील कामकाजात बराच गोंधळ आहे. येथे कोणाचा पायपोस कोणाला नाही, अशी स्थिती आहे. येथील ग्रामपंचायत पदाधिकाऱ्यांनी दोन-तीनवेळा संस्थेत जाऊन आंदोलन केले आहे. त्या त्यावेळी वेळ मारून नेण्याचे प्रयत्न झाले, पण नंतर स्थिती ‘जैसे थे’ अशीच राहिली आहे.येथील औद्योगिक प्रशिक्षण संस्थेतील गैरसोयीबाबत सहकारमंत्री चंद्रकांतदादा पाटील व संंबंधित विभागाचे मंत्री, अधिकारी यांना भेटून त्या दूर करण्यासाठी प्रयत्न सुरू आहेत.- दीपक शिरगांवकर, उपाध्यक्ष तालुका भाजपयेथील रिक्त पदे व निधीबाबत पुणे येथील व्यवसाय शिक्षक व प्रशिक्षण सहसंचालक यांच्याकडे बऱ्याचवेळा पत्रव्यवहार केला आहे.- एस. एस. बागेवाडी, प्रभारी प्राचार्य