रुईकर कॉलनीत सन्नाटा अन् जल्लोष एकच कॉलनी : धनंजय महाडिक, मंडलिक यांच्या निवासस्थानाची स्थिती

 कोल्हापूर : निवडणुकीच्या निकालाची कुणकुण लागताच धनंजय महाडिक यांच्या रुईकर कॉलनीतील निवासस्थानाच्या दारात कार्यकर्त्यांनी जोरदार गुलालाची उधळण करीत फटाक्यांची आतषबाजी केली; तर रस्त्याच्या दुसर्‍या बाजूला खासदार सदाशिवराव मंडलिक यांच्या निवासस्थानी कार्यकर्ते चिंताग्रस्त मुद्रेने बसले होते. रुईकर कॉलनीत ‘कहीं खुशी, कहीं गम’ अशी परिस्थिती होती. सन्नाटा अन् जल्लोष अशा दोन्ही अवस्था रुईकर कॉलनीने अनुभवल्या. सकाळी दहा वाजल्यापासून निवडणुकीचे चित्र स्पष्ट होताच कार्यकर्त्यांचा ताफा रुईकर कॉलनीकडे वळू लागला. गुलालाने माखलेल्या हातांत राष्टÑवादीचा झेंडा घेऊन घोषणाबाजी करीत कार्यकर्त्यांचा जथ्था धनंजय महाडिक यांच्या निवासस्थानाकडे जात होता. दारात घोषणा देऊन गुलालाची उधळण व फटाक्यांची आतषबाजी करीत पंपावरील कार्यालयाकडे कार्यकर्ते जात होते. सायंकाळपर्यंत कार्यकर्त्यांचा लोंढा महाडिकांच्या निवासस्थानाकडे येत होता. दुसर्‍या बाजूला रुईकर कॉलनीतील खासदार सदाशिवराव मंडलिक यांच्या निवासस्थानी कार्यकर्ते बसून होते. मतमोजणी कें द्रातून येणार्‍या निरोपाची आतुरतेने वाट पाहून आकडेमोड करीत होते. बंगल्याच्या बागेत व कार्यालयात कार्यकर्ते मोठ्या संख्येने बसून मतमोजणी फेर्‍यांकडे लक्ष ठेवत होते. रात्री उशिरापर्यंत मंडलिक यांना भेटण्यासाठी कार्यकर्ते बंगल्यात येत होते. (प्रतिनिधी)