लोकमत न्यूज नेटवर्क
कोल्हापूर : नव्या वर्षामध्ये कोरोना प्रतिबंधक लस देण्यासाठीची जय्यत तयारी प्रशासन आणि आरोग्य विभागाच्या पातळीवर सुरू आहे. जिल्ह्यात साडेअकरा हजार लिटर लस साठवणूक करण्याची क्षमता असून, या माध्यमातून ४५ लाख ३९ हजार सात डोस दिले जाणार आहेत. मात्र पोर्टलवर नावनोंदणी केल्याशिवाय कोणालाही लस उपलब्ध होणार नाही.
कोरोनाची लस देण्यासाठीचे नियोजन सर्वच पातळ्यांवर सुरू आहे. जानेवारी २०२१ च्या दुसऱ्या आठवड्यात लस उपलब्ध होण्याची शक्यता आहे. नंतरच्या आठ दिवसांमध्ये गट अ मधील अधिकारी, कर्मचाऱ्यांना लस दिली जाईल. ही संख्या २० हजारांच्या पुढे आहे. यानंतर लगेचच दुसरा टप्पा सुरू होईल. ब गटासाठी दुसरा टप्पा असून यामध्ये संख्या अधिक असणार आहे. त्यानंतर क गटासाठी लसीकरण सुरू होणार आहे. तिसरा टप्पाही जास्त दिवस चालण्याची शक्यता आहे.
लस देण्यात येणाऱ्या प्रत्येकाची सविस्तर नोंदणी केली जाणार असल्याने नावनोंदणीशिवाय एकालाही लस दिली जाणार नाही. यासाठी सध्या संबंधित विभागांना पोर्टलवर अधिकारी, कर्मचारी यांची नावे नोंदणी करण्यास सांगण्यात आले आहे. पहिल्या टप्प्यातील अ गटातील लस घेणाऱ्यांची संख्या कमी आहे. हा ताण नंतरच्या ब आणि क गटांत वाढणार आहे.
अ गट
वैद्यकीय अधिकारी, आरोग्य कर्मचारी, नर्सेस, सरकारी आणि खासगी रुग्णालयांतील सर्व कर्मचारी, वैद्यकीय महाविद्यालयातील अधिकारी, कर्मचारी, आशा वर्कर्स, अंगणवाडी कर्मचारी.
ब गट
पोलीस दल, नागरी दल, ग्रामपंचायत, जिल्हा परिषद, नगरपालिका, महानगरपालिका कर्मचारी.
क गट
५० वर्षांवरील सर्व नागरिक आणि ज्यांना जुने आजार आहेत असे नागरिक
चौकट
प्रत्येक केंद्रावर तीन खोल्या
लसीकरण करावयाच्या प्रत्येक केंद्रावर तीन खोल्या राहणार आहेत. पहिल्या खोलीमध्ये संबंधितांची नोंदणीनुसार खातरजमा केली जाईल. दुसऱ्या खोलीत प्रत्यक्ष लस दिली जाईल; तर तिसऱ्या खोलीत अर्ध्या तासासाठी संबंधितांना बसवून ठेवण्यात येईल. ज्याला रिकव्हरी रूम म्हटले जाईल.
चौकट
दोन, तीन वेळा डोस घ्यावे लागणार
शासनाकडून चार कंपन्यांचे व्हॅक्सिन पुरवण्यात येणार आहेत. यातील एका कंपनीचे डोस दोन वेळा घ्यावे लागणार आहेत; तर तीन कंपन्यांचे डोस तीन वेळा घ्यावे लागणार आहेत. त्यामुळे हीच प्रक्रिया पुन्हा राबवावी लागणार आहे.
चौकट
लस साठवण उपलब्धता
जिल्हास्तरीय साठवण क्षमता - ६८७ लिटर
जि.प.व नगरपालिका साठवण क्षमता - ९१३१ लिटर
कोल्हापूर महापालिका क्षमता - १५२६ लिटर
एकूण - ११,३४४ लिटर
चौकट
जिल्हा परिषदेची तालुकावार साठवण क्षमता
तालुका लस साठवण क्षमता लिटरमध्ये
आजरा ३२३
भुदरगड ३२९
चंदगड ४६६
गडहिंग्लज ६९९
गगनबावडा १३८
हातकणंगले १३८१
कागल ५८५
करवीर १०६३
पन्हाळा ६२३
राधानगरी ७१६
शाहूवाडी ७०२
शिरोळ ७३४
एकूण ७७५९
चौकट
१०० हून अधिक वाहने
लस वाहतूक करण्यासाठी जिल्ह्यातील सर्व आरोग्य संस्थांच्या रुग्णवाहिकांचा वापर केला जाणार आहे. जिल्हा परिषदेच्या ७५ प्राथमिक आरोग्य केंद्रांकडील ७५ गाड्या यासाठी वापरण्यात येतील. कोल्ड बॉक्समधून ही वाहतूक करावयाची असल्याने यासाठी आवश्यक वाहने उपलब्ध असल्याचे जिल्हा आरोग्याधिकारी डॉ. योगेश साळे यांनी सांगितले.
कोट
राज्य शासनाने दिलेल्या मागंदर्शक सूचनांप्रमाणे सध्या पहिल्या टप्प्यातील अ गटातील लस देण्यासाठी पात्र असणाऱ्यांची माहिती भरण्याचे काम युद्धपातळीवर सुरू आहे. महापालिका, नगरपालिका, जिल्हा परिषद अशा संस्थात्मक पातळ्यांवर हे काम सुरू आहे. साठवणुकीची जिल्ह्याची क्षमता चांगली असून त्या दृष्टीनेही नियोजन सुरू आहे.