जयसिंगपूर : सर्वत्र लसीचा तुटवडा असला तरी केंद्र सरकारने ४५ पुढील सर्वांची जून अखेर लसीकरण करण्याची तयारी केली आहे. अठरा वर्षांपुढील लसीकरणाची जबाबदारी राज्य सरकारवर देण्यात आली आहे. पण म्हणावे तितके गांभीर्य राज्य सरकारने न घेतल्याचा आरोप भाजपाचे प्रदेशाध्यक्ष आमदार चंद्रकांत पाटील यांनी केला.
जयसिंगपूर येथील डॉ. जे. जे. मगदूम ट्रस्टच्या होमिओपॅथिक व आयुर्वेदिक कॉलेजच्या रुग्णालयामध्ये कोविड उपचार केंद्राची पाहणी आमदार पाटील यांनी केली. याठिकाणी करण्यात आलेली सुविधा निश्चितच रुग्णांसाठी उपयुक्त असल्याचे सांगून ते म्हणाले, कोरोनाची दुसरी लाट कमी झाली असली तरी तिसरी लाट भयानक येण्याची शक्यता वर्तविण्यात येत आहे. त्यामुळे सर्वांनी काळजी घेण्याची गरज आहे.
प्रारंभी स्वागत ट्रस्टचे अध्यक्ष डॉ. विजयराज मगदूम यांनी केले. तर रुग्णालयाच्या कार्याची माहिती ट्रस्टच्या उपाध्यक्षा अ‍ॅड. सोनाली मगदूम यांनी दिली. यावेळी रुग्णालयात कार्यरत असलेल्या डॉक्टर व पारिचारिका यांचा सन्मान आमदार पाटील यांच्याहस्ते करण्यात आला. यावेळी नगराध्यक्षा डॉ. नीता माने, पृथ्वीराज यादव, राजवर्धन निंबाळकर, मंडल अध्यक्ष रमेश यळगुडकर, मिलिंद भिडे, नगरसेवक अरविंद माने, विठ्ठल पाटील यांच्यासह मान्यवर उपस्थित होते.
फोटो - ३१०५२०२१-जेएवाय-०१
फोटो ओळ - जयसिंगपूर येथे डॉक्टर व पारिचारिका यांचा आमदार चंद्रकांत पाटील यांच्या हस्ते सन्मान करण्यात आला. यावेळी डॉ. विजयराज मगदूम, अ‍ॅड. सोनाली मगदूम, विठ्ठल पाटील उपस्थित होते.