गुवाहाटी : जाहिरात बातमीच्या स्वरूपात छापल्याप्रकरणी काँग्रेसने मुख्यमंत्री सर्बानंद सोनोवाल, भाजप अध्यक्ष जे. पी. नड्डा, प्रदेशाध्यक्ष रंजितकुमार दास यांच्यासह आठ वर्तमानपत्रांविरोधात पोलिसात तक्रार दाखल केली.
काँग्रेसचा आरोप आहे की, आसाम विधानसभा निवडणुकीच्या पहिल्या टप्प्यात अप्पर आसाममधील सर्व जागा जिंकत असल्याची जाहिरात वर्तमानपत्रात बातमीच्या स्वरूपात छापण्यात आली आहे. आदर्श आचारसंहितेचे उल्लंघन, निवडणूक आयोगाच्या मार्गदर्शक तत्त्वांचे उल्लंघन केल्याप्रकरणी आम्ही तक्रार दाखल केल्याचे काँग्रेसचे कायदा विभागाचे अध्यक्ष निरन बोरा यांनी सांगितले.
बोरा म्हणाले की, मुख्यमंत्री सोनोवाल, भाजप अध्यक्ष, प्रदेशाध्यक्ष आणि इतर सदस्यांनी दुसऱ्या व तिसऱ्या टप्प्यातील मतदारांना प्रभावित करण्यासाठी पूर्वनियोजित पद्धतीने विविध वर्तमानपत्रांत बातमीच्या स्वरूपात जाहिरात छापली आहे. यामध्ये भाजप २७ मार्च रोजी पहिल्या टप्प्यात झालेल्या अप्पर आसाममधील सर्व जागा जिंकत असल्याचा दावा करण्यात आला आहे.
आसाम प्रदेश काँग्रेस कमिटीने मुख्य निवडणूक अधिकारी नितीन खाडे यांच्याकडे तक्रार करत, पोलिसात तक्रार दिलेल्या व्यक्ती आणि वर्तमानपत्रांवर तात्काळ कारवाई करण्याची मागणी केली आहे.
दरम्यान, या प्रकाराची निवडणूक आयोग चौकशी करेल, अशी माहिती मुख्य निवडणूक अधिकारी कार्यालयातील अधिकाऱ्याने रविवारी रात्री दिली आहे.