मायाप्पा दाखला झाला का, मायाप्पा लवकर दे की, अशा हाकेने शिरोळ तहसील कार्यालयातील शाहू सेतू केंद्र दिवसभर गजबजत होते. तर सगळ्यांना दोस्ता, मित्रा, ताई, काका, दादा तुमचं काम होईल थोडा वेळ थांबा, अशी प्रेमाची हाक देत काम करणारा मायाप्पा कांबळे यांचा कोरोनामुळे मृत्यू झाल्याने शिरोळ तहसील कार्यालय ते औरवाड परिसरात सर्वांना धक्का बसला आहे. मायाप्पा श्रावण कांबळे (वय ३३) च्या अचानक जाण्याने अनेकांचा काळजाचा ठोका चुकला आहे.
शिरोळ तहसील कार्यालयात शाहू सुविधा केंद्र सेतूचे व्यवस्थापन औरवाडमध्ये राहणारा तरुण मायाप्पा करीत होता. हलाखीची परिस्थितीला तोंड देत त्याने अल्पावधीत प्रगती केली होती. शिरोळ तालुक्यातील दररोज जातीचे दाखले, उत्पन्नाचे दाखले यासह अनेक कामासाठी येणाऱ्या शेकडो लोकांना कामाच्या तणावातून तोंड देत काम करीत होता. ग्रामपंचायत निवडणूक असो की शैक्षणिक कामासाठी दिवस- रात्र राबत दाखले उपलब्ध करीत असे. तहसीलदार असो की नायब तहसीलदार सगळ्यांनी मायाप्पाच्या कामाचे कौतुक केले आहे. शनिवार, रविवारची सुट्टीची पर्वा न करता मायाप्पा काम करीत असे.
दोन आठवड्यांपूर्वी मायाप्पाला कोरोनाची लागण तहसील कार्यालयात काम करताना झाली. सुरुवातीस त्रास नसल्याने उदगाव येथील कुंजवन कोविड सेंटरमध्ये उपचारासाठी दाखल करण्यात आले आहे. त्यानंतर तब्येत खालावल्याने सांगली येथील खासगी रुग्णालयात उपचारासाठी दाखल करण्यात आले होते. दोन आठवडे कोरोनाविरोधात सुरू असलेल्या संघर्षात अखेर मायाप्पाची प्राणज्योत मालवली. त्याच्या निधनाचे वृत्त समजताच अनेकांना धक्का बसला आहे. त्याच्या पश्चात पत्नी, दोन मुली, आईवडील, दोन भाऊ असा परिवार आहे. त्याच्या जाण्याने नेहमी तहसील कार्यालयात मायाप्पा काम झाल का? ही हाक आत ऐकू येणार नाही.
फोटो - २९०५२०२१-जेएवाय-०१-मृत मायाप्पा कांबळे