संदीप बावचे :
लोकमत न्यूज नेटवर्क
जयसिंगपूर : शिरोळ तालुक्यातील दत्तवाड जिल्हा परिषद गट, दानोळी पंचायत समिती गण तसेच अब्दुललाट, राजापूर, राजापूरवाडी ग्रामपंचायतीतील चार जागांसाठी पोटनिवडणुका होणार आहेत. शिरोळ नगरपालिकेतही एका जागेसाठी पोटनिवडणूक होणार आहे. घोसरवाड सरपंचपदाचा मार्गदेखील मोकळा झाला आहे. त्यामुळे ३३ ग्रामपंचायतींच्या निवडणुकीनंतर तालुक्यात पोटनिवडणुकीच्या निमित्ताने राजकीय वातावरण तापणार आहे. त्यामुळे या निवडणुकीच्या तारखेकडे इच्छुकांचे लक्ष लागून राहिले आहे.
जिल्हा परिषद सदस्य प्रवीण माने यांचे निधन झाल्यामुळे दत्तवाड जिल्हा परिषदेची जागा रिक्त आहे. नुकत्याच झालेल्या दत्तवाड ग्रामपंचायतीच्या निवडणुकीत इच्छुकांनी जिल्हा परिषद निवडणुकीचा प्रचार केला आहे. शिवाय, काँग्रेसकडून उमेदवारी कोणाला मिळणार, याबाबतही उत्सुकता असली तरी यड्रावकर गट, भाजपची भूमिकाही महत्त्वाची ठरणार आहे.
दानोळी पंचायत समितीचे सदस्य सुरेश कांबळे यांचे निधन झाल्याने ही जागा रिक्त आहे. स्वाभिमानी शेतकरी संघटना विरुद्ध महाविकास आघाडी असे चित्र अपेक्षित आहे. अब्दुललाट ग्रामपंचायतीत तीन, राजापूर एक व राजापूरवाडी ग्रामपंचायतीतील दोन जागा रिक्त आहेत. त्यामुळे याठिकाणी पोटनिवडणुका होणार आहेत.
शिरोळ नगरपालिकेत भाजपचे नगरसेवक दादासाहेब कोळी यांचे पद अपात्र ठरल्याने या जागेसाठीही पोटनिवडणूक होणार आहे. दरम्यान, निवडणुकीनंतर वर्षभराच्या आत जातीचा दाखला दिला नसल्याने कोळी यांचे नगरसेवकपद अपात्र ठरले होते. या एका जागेसाठी काँग्रेस, यड्रावकर गट, स्वाभिमानी प्रणित शाहू आघाडी विरुद्ध भाजप अशी लढत अपेक्षित आहे. पोटनिवडणुकीच्या अनुषंगाने मतदार यादीचा कार्यक्रम पूर्ण झाला आहे. कोरोनाच्या पार्श्वभूमीवर सध्या या पोटनिवडणुका लांबणीवर पडल्या आहेत. त्यामुळे निवडणूक आयोगाच्या आदेशाकडे इच्छुकांच्या नजरा लागून आहेत.
चौकट - घोसरवाडचा मार्ग मोकळा
सरपंच आरक्षण सोडतीत घोसरवाडला अनुसूचित जमाती महिला असे आरक्षण जाहीर झाले होते. मात्र, या पदाचा सदस्य नसल्याने ही जागा रिक्त राहिली होती. अनुसूचित जमाती महिला ऐवजी अनुसूचित जातीच्या सदस्याला सरपंचपद देण्याबाबत कार्यवाही झाली असून, सरपंच निवडीच्या तारखेकडे लक्ष लागून राहिले आहे.