कोल्हापूर : दोन मंडळांच्या गणेशमूर्तींचे विसर्जन सुरू असताना, एकमेकांकडे खुनशी नजरेने पाहिल्याच्या कारणास्तव दोन गटांत वाद उफाळला. हल्लेखोरांनी दोघांच्या घरात घुसून काठ्या, लोखंडी गजाने आठ जणांना बेदम मारहाण केली. परिसरातील १२ दुचाकी व एका रिक्षाची मोडतोड करून दहशतीचे वातावरण निर्माण केले. ही घटना रविवारी रात्री उशिरा शनिवार पेठेतील गवळी गल्लीत घडली. हल्ल्यात आठ जण जखमी झाले असून, दहा जणांवर गुन्हा नोंद झाला.
जखमींची नावे अशी : दिलीप विष्णुपंत गवळी (५८), त्यांची पत्नी सुनीता गवळी, मुलगा निखिल गवळी, स्वयंम गजानन गवळी (१९), गायत्री गजानन गवळी, सुरेश बळवंतगवळी, आक्काताई गवळी, प्रणाली विक्रम मोतीपुरे (सर्व रा.गवळी गल्ली).
गुन्हा दाखल संशयितांची नावे : हर्ष घोटणे, प्रसाद काळे, श्रावण गजगेश्वर, यश घोटणे, अभिषेक काळे (सर्व रा.शनिवार पेठ), तसेच अनोळखी ४ ते ५ जण.
पोलिसांनी दिलेली माहिती अशी की, न्यू सम्राट चौक तरुण मंडळ व जोशी गल्लीतील संरक्षण तरुण मंडळांच्या गणेशमूर्तींचे रविवारी सायंकाळी विसर्जन सुरू होते. यावेळी स्वयंम गवळी आणि संरक्षण मंडळाचा कार्यकर्ता श्रावण गजगेश्वर यांच्यात एकमेकांकडे बघण्यावरून वाद झाला. काहींनी मध्यस्थीने वाद मिटविला. रात्री उशिरा त्याच वादाचे पडसाद उमटले. संशयितांनी दिलीप गवळी याच्या घरात घुसून काठ्या व गजाने दिलीप गवळी, पत्नी सुनीता, मुलगी प्रणाली व पुतण्या स्वयंम, निखिल यांना मारहाण केली.
हल्लेखोरांनी सुरेश गवळी याच्या घरावरही हल्ला केला. गवळी याच्यासह त्यांची आई आक्काताई गवळी यांनाही मारहाण केली.
हल्लेखोरांनी दहशतीसाठी परिसरातील १२ दुचाकी व एका रिक्षांची मोडतोड केली. हल्ल्यात दोन घरांतील आठ जण जखमी झाले.
या प्रकरणी दिलीप गवळी यांच्या तक्रारीवरून सोमवारी लक्ष्मीपुरी पोलिसांत दहा जणांवर गुन्हा दाखल झाला, पोलीस त्यांचा शोध घेत आहेत.