लोकमत न्यूज नेटवर्क
कोल्हापूर : जागेच्या बाबतीत सुधारीत प्रस्ताव तयार असून येत्या सहा महिन्यांत मराठा स्वराज्य भवनचा प्रश्न मार्गी लागेल, अशी ग्वाही आमदार चंद्रकांत जाधव यांनी दिली. हे भवन मंगलकार्य नव्हे ते शिक्षण, प्रशिक्षणाचे केंद्र ठरेल, असा विश्वासही त्यांनी व्यक्त केला.
मराठा वार्षिक दिनदर्शिकेच्या २२ व्या अंकाचे प्रकाशन शुक्रवारी सायंकाळी शाहू स्मारक भवनमध्ये झाले. त्यावेळी ते बोलत होते. निवृत्त पोलीस अधिकारी पंढरीनाथ मांढरे, मराठा महासंघाचे नेते वसंतराव मुळीक प्रमुख उपस्थित होते.
आमदार जाधव म्हणाले, ‘सारथी’च्या सक्षमीकरणात माझा हातभार राहिला हे मी माझे भाग्य समजतो. येथून पुढे देखील समाजाच्या पाठीशी ठामपणे उभा राहीन. आरक्षणाचा लढा न्यायालयात आहे, येथे सक्षमपणे बाजू मांडण्यासाठी आरक्षणावरून समाजातील दोन प्रवाहांनी एकत्र येणे ही काळाची गरज आहे. राज्य सरकार यासंदर्भात लवकरच दिल्लीत बैठक घेत आहे, पण हा प्रश्न केंद्र सरकारने मनात आणला तर लगेच सुटू शकतो, त्यामुळे केंद्र सरकारने भूमिका घ्यावी, यासाठी संघटितपणे पाठपुरावा करण्याची गरज आहे.
निवृत्त पोलीस अधिकारी मांडरे यांनी बिंदू नामावलीनुसारच आरक्षण मिळाले पाहिजे. एकूण ४९ टक्के मागासवर्गीय आरक्षण असताना आणि ५१ टक्के खुले असतानाही मागासवर्गीय खुल्या प्रवर्गात शिरकाव करतात. हे थांबविले तर मराठ्यांना स्वतंत्र आरक्षणाची कधी मागणीच करावी लागणार नाही, अशी अपेक्षा व्यक्त केली. मुळीक, चंद्रकांत चव्हाण, सुरेंद्र घोरपडे यांनी मनोगत व्यक्त केले. प्रास्ताविक उत्तम जाधव यांनी केले. सूत्रसंचालन डॉ. प्रदीप पाटील यांनी केले. आभार शैलजा भोसले यांनी मानले. कार्यक्रमाला डॉ. संदीप पाटील, डॉ. भरत कोटकर, अनंत म्हाळुंगेकर, संजय जाधव, अवधूत पाटील, कृष्णाजी हारूगडे उपस्थित होते.
(फोटो : आदित्य : अजून आलेला नाही, पाठवतो.)