लोकमत न्यूज नेटवर्क
धामोड : कुरणेवाडी (ता. राधानगरी) येथील अल्पसंख्याक समाजातील १७ वर्षांच्या अल्पवयीन मुलीवर पीडित मुलीच्या भावाच्या सासऱ्यानेच बलात्कार केल्याची घटना गुरुवारी मध्यरात्री घडली. या घटनेची फिर्याद स्वतः पीडित मुलीने राधानगरी पोलिसांत दिली आहे. याप्रकरणी आरोपी जमीर खुदबुद्दीन दरवेशी ऊर्फ पठाण (वय ४३) रा. कोगील बुद्रुक (ता. करवीर) याला राधानगरी पोलिसांनी तत्काळ अटक केली आहे व त्याला न्यायालयासमोर उभे केले असता त्याला दहा डिसेंबरपर्यंतची पोलीस कोठडी देण्यात आली आहे.
घटनेबाबत राधानगरी पोलिसांतून मिळालेली माहिती अशी, धामोडपैकी कुरणेवाडी (ता. राधानगरी) येथील एका अल्पसंख्याक कुटुंबामध्ये आरोपी जमीर खुदबुद्दीन दरवेशी ऊर्फ पठाण यांची मुलगी देण्यात आली आहे. या मुलीच्या नवीन घराचे बांधकाम सुरू आहे. या बांधकामासाठी त्यानेच कोगील बुद्रुक या ठिकाणावरून बांधकामासाठी गवंडी आणले आहेत. सदर गवंड्यांचे उर्वरित बांधकाम साहित्य घेऊन आरोपी दरवेशी कुरणेवाडी येथे आला होता. दरम्यान, पीडित मुलगीचे वडील मासेमारी व्यवसायानिमित्त बाहेर गेले होते. ते मध्यरात्री परतले. यावेळी घरातील सर्व मंडळी झोपलेली होती. त्यामुळे तेही जेवण करून झोपी गेले. याच मध्यरात्री आरोपी जमीर खुदबुद्दीन दरवेशी ऊर्फ पठाण याने पीडित मुलगी एकटीच स्वतःच्या खोलीमध्ये असल्याचे खात्री करून खोलीत प्रवेश करीत तिचे तोंड दाबून धमकी देत तिच्यावरती बलात्कार केला.