* जयसिंगपूर येथे माध्यमिक शिक्षक पतसंस्थेकडून सत्कार
जयसिंगपूर : विश्वास हीच खरी पतसंस्थेची गुंतवणूक आहे. सभासदांचा व ठेवीदारांचा पतसंस्थेवर असलेल्या विश्वासाला जेव्हा व्यावसायिकतेची जोड मिळते तेव्हाच संस्था यशस्वी होते. संस्थेने सभासद केंद्रबिंदू मानून त्यांच्या हिताचा नेहमी विचार केला आहे, असे प्रतिपादन कोल्हापूर जिल्हा माध्यमिक शिक्षक शिक्षकेतर कर्मचारी संस्थेचे संचालक दादासाहेब लाड यांनी केले.
जयसिंगपूर येथील मालू हायस्कूलमध्ये कोल्हापूर जिल्हा माध्यमिक शिक्षक शिक्षकेतर कर्मचारी संस्थेच्यावतीने शिरोळ तालुक्यातील मयत सभासदांच्या वारसांना मयत कल्याण निधी, सेवानिवृत्त सभासद यासह नूतन मुख्याध्यापकांच्या सत्कारप्रसंगी कार्यक्रमात ते बोलत होते. अध्यक्षस्थानी संस्थेचे अध्यक्ष बाळ डेळेकर होते.
प्रारंभी स्वागत संजय सुतार यांनी केले. यावेळी लाड यांच्या हस्ते मुख्याध्यापक दादासो वाडकर, अजितकुमार खवाटे, माणिक नागावे, बजरंग जोंग, उदय पाटील, राजू प्रधाने यांचा सत्कार करण्यात आला.
यावेळी बबन काटकर, नंदकुमार सुतार, अनिल पाटील, आर. वाय. पाटील, गौतम पाटील, धनंजय धोत्रे यांच्यासह शिक्षक उपस्थित होते.