लोकमत न्यूज नेटवर्क
हुपरी : हुपरी (ता. हातकणंगले) शहर व परिसरातील गावांमध्ये अनेक प्रकारच्या समस्या आहेत. या समस्यांचे निराकरण करून संपूर्ण परिसराचा सर्वांगिण विकास होण्यासाठी आगामी काळात कोट्यवधी रुपयांचा विकासनिधी उपलब्ध करून दिला जाईल, असे प्रतिपादन आमदार राजू जयवंतराव आवळे यांनी केले.
हुपरी (ता. हातकणंगले) येथील जनसंपर्क कार्यालयाचे उद्घाटन व विकासकामांच्या शुभारंभप्रसंगी ते बोलत होते. या कार्यक्रमाच्या अध्यक्षस्थानी मानसिंगराव देसाई होते. यावेळी पैसाफंड बँक ते भेंडवडे गल्ली रस्ता कामासाठी १५ लाख रुपये, हुपरी ते तळंदगे रस्ता कामासाठी १० लाख रुपये, गंगानगर वसाहतीतील रेणुका मंदिरातील फरशी व रस्ता काॅंक्रिटीकरण कामासाठी १० लाख रुपये अशा एकूण ३५ लाख रुपयांच्या कामांचा प्रारंभ करण्यात आला.
आमदार आवळे म्हणाले, या परिसरातील सर्वसामान्य नागरिकांची तालुक्यात जाण्यासाठी होणारी ससेहोलपट दूर करण्यासाठी हुपरी शहरात जनसंपर्क कार्यालय उघडले आहे. याचा लाभ परिसरातील नागरिकांनी घ्यावा. सर्वसामान्य नागरिकांच्या हक्काचा मी आमदार असून, नागरिकांच्या शासकीय पातळीवरील अडीअडचणी सोडविण्यासाठी जनसंपर्क कार्यालयात आठवड्यातून किमान दोनवेळा उपस्थित राहणार आहे.
मानसिंगराव देसाई म्हणाले, आमदार राजू आवळे यांनी आमदारपदाला साजेशी कामगिरी करत अल्पावधीतच आपल्या कामाचा ठसा जनमानसात उमटवला आहे. संजय गांधी निराधार योजनेसह विविध योजना राबवून सर्वसामान्यांना आधार देण्याचे काम केले आहे.
यावेळी हातकणंगले तालुका काॅंग्रेसचे अध्यक्ष भगवान जाधव, काँग्रेस शहराध्यक्ष लालासाहेब देसाई, उपाध्यक्ष बाबासाहेब गायकवाड, राजेंद्र होगाडे, रामचंद्र कीर्तीकर, अनिल धोंगडे, धर्मवीर कांबळे, चंद्रकांत परकारे, उदय कंगणे, अँड. संदीप कदम, शाहू म्हत्रे, शब्बीर जमादार, रमजान घुडुभाई, अशोक बल्लोळे आदी उपस्थित होते. स्वागत व प्रास्ताविक लालासाहेब देसाई यांनी केले. सूत्रसंचालन कबीर आळतेकर यांनी केले तर उपाध्यक्ष बाबासाहेब गायकवाड यांनी आभार मानले.
फोटो ओळी : हुपरी (ता. हातकणंगले) येथील जनसंपर्क कार्यालयाचे उद्घाटन व विकासकामांच्या शुभारंभप्रसंगी आयोजित कार्यक्रमात आमदार राजू आवळे यांनी मार्गदर्शन केले. यावेळी मानसिंग देसाई, रामचंद्र कीर्तीकर, लालासाहेब देसाई, बाबासाहेब गायकवाड, राजेश होगाडे आदी उपस्थित होते.