प्रदीप स्पोर्टस्, आर.सी.एफ. विजयी

व्हीआयपी चषक क्रिकेट

कोल्हापूर : फायटर्स क्लब व मॅक्सवेल इंडस्ट्रीज, मुंबई यांच्यावतीने आयोजित ‘व्हीआयपी चषक’क्रिकेट स्पर्धेत बुधवारी झालेल्या सामन्यात प्रदीप स्पोर्टस् संघाने भिडे स्पोर्टस् संघावर ८ गडी राखून, तर आर.सी.एफ. मुंबई संघाने शाहूपुरी जिमखाना संघावर १२६ धावांनी विजय मिळविला. शास्त्रीनगर मैदानावर प्रदीप स्पोर्टस् विरुद्ध भिडे स्पोर्टस् यांच्यामध्ये सामना खेळविण्यात आला. यामध्ये प्रथम फलंदाजी करताना भिडे स्पोर्टस्ने २९ षटकांत सर्वबाद १९८ धावा केल्या. यामध्ये अवधूत पाटील याने ५१, इंद्रजित खडकेने ३४, तर तुषार पाटीलने २८ धावा केल्या. गोलंदाजी करताना प्रदीप स्पोर्टस्कडून सिद्धार्थ घुले व अमित कदम यांनी प्रत्येकी तीन गडी बाद केले. उत्तरादाखल खेळताना प्रदीप स्पोर्टस्कडून १९.४ षटकांत दोन गडी गमावून हे आव्हान पूर्ण केले. यामध्ये प्रेम साळवी याने ८५ धावा केल्या, तर करण मोनिशने नाबाद ६७ धावा केल्या. गोलंदाजी करताना भिडे स्पोर्टस्कडून मिलिंद गायकवाड, तुषार पाटील यांनी प्रत्येक एक गडी बाद केला. शाहूपुरी जिमखाना येथे आर.सी.एफ. मुंबई विरुद्ध शाहूपुरी जिमखाना यांच्यामध्ये सामना खेळविण्यात आला. यामध्ये प्रथम फलंदाजी करताना आर.सी.एफ. मुंबई संघाने ३७.१ षटकांत सर्वबाद २४३ धावा केल्या. यामध्ये अनुकर सिंघ याने ५२, रवी सोळंखीने ४२, सिद्धांत आधातरावने ४०, अभिषेक श्रीवास्तवने ३४ धावा केल्या. गोलंदाजी करताना शाहूपुरी जिमखाना संघाकडून आकाश पाटील, अजित बागडी आणि शुभम रणावरे यांनी प्रत्येकी दोन गडी बाद केले. उत्तरादाखल खेळताना शाहूपुरी संघाने २९ षटकांत सर्वबाद ११७ धावांपर्यंतच मजल मारली. यामध्ये रवी पाटील, महेंद्र शिवसरण व दीपक हत्तीकरने प्रत्येकी १३ धावा केल्या. गोलंदाजी करताना आर.सी.एफ. संघाकडून जयमित टेलर याने तीन, तर अनकुर सिंहने दोन गडी बाद केले.