चित्रनगरीचे ‘चित्र’ पालटणार

विकास दृष्टिक्षेपात : १७ कोटी ४ लाख मंजूर; ५ कोटी ४० लाखांचा निधी वर्ग

इंदुमती गणेश - कोल्हापुरातील चित्रपट व्यावसायिकांसाठी दिवास्वप्न बनून राहिलेल्या कोल्हापूर चित्रनगरीच्या विकासाची चिन्हे आता दृष्टिक्षेपात येत आहेत. शासनाच्या सन २०१४-१५च्या अर्थसंकल्पात चित्रनगरीसाठी नऊ कोटींची तरतूद करण्यात आली असून, त्यांपैकी ५ कोटी ४० लाख रुपये विभागाकडे वर्ग झाले आहेत; तर कंपाउंडच्या उर्वरित कामाला आठ-दहा दिवसांत सुरुवात होणार आहे. याशिवाय चित्रनगरीसाठी आणखी १७ कोटी ४ लाखांचा निधी मंजूर झाला असून, तो वर्ग झाला की परिसरातील लोकेशन्स करण्यात येणार आहेत. दोन दिवसांपूर्वी पुणे फिल्म फेस्टिव्हलच्या उद्घाटना दरम्यान, मुख्यमंत्री देवेंद्र फडणवीस यांनी मुंबईतील फिल्मसिटीसोबतच कोल्हापूर चित्रनगरी सुसज्ज करणार असल्याचे जाहीर केले आहे. त्यामुळे पुन्हा एकदा चित्रनगरीच्या चर्चेला सुरुवात झाली आहे. आंदोलनानंतर शासनाने कोल्हापूर चित्रनगरीच्या विकासाचे आश्वासन दिले. त्या घटनेला आता दहा वर्षे झाली आहेत. या काळात सांस्कृतिक कार्यमंत्री बदलले, मुख्यमंत्री बदलले, आता सत्ताही बदलली; पण चित्रनगरीचे विदारक रूप काही बदलले नाही. तीन वर्षांपूर्वी शासनाच्या अर्थसंकल्पात १० कोटींच्या निधीची घोषणा झाली. त्यातील तीन कोटी रुपये कंपाउंडच्या बांधणीसाठी खर्च झाले. आता सरकार बदलले असले तरी त्यामुळे चित्रनगरीच्या विकासकामांवर गंडांतर आलेले नाही. त्यामुळे सन २०१४-१५ सालासाठी तरतूद झालेल्या नऊ कोटींपैकी ५ कोटी ४० लाखांचा निधी वर्ग झाला आहे. चित्रनगरीच्या कंपाउंडचे काही काम शिल्लक राहिले आहे. त्याठिकाणी पाण्याचा प्रवाह असल्याने तिथे घडविलेला दगड चालत नाही. २० फूट उंचीचे बांधकाम करावे लागणार आहे. त्यासाठी प्रसिद्ध झालेली निविदा ठेकेदाराला मंजूर करण्यात आली असून, येत्या आठ ते दहा दिवसांत कंपाउंडचे काम सुरू होईल, असे चित्रनगरीचे व्यवस्थापकीय संचालक संजय पाटील यांनी सांगितले. शासनाकडे सातत्याने केलेल्या पाठपुराव्यांमुळे चित्रनगरीच्या मंजूर निधीपैकी काही निधी खात्यावर वर्ग झाला आहे. त्यातून कंपाउंडच्या कामासोबतच लोकेशन्सच्याही कामाला सुरुवात करण्यात येणार आहे. चित्रनगरीच्या सुसज्जतेसाठी नव्याने आराखडा बनविण्यात आला असून, मंत्रिमंडळाच्या बैठकीत त्यावर चर्चा होऊन मंजूर १७ कोटींमध्ये विकासकामांना सुरुवात होईल, असेही पाटील यांनी सांगितले.कोल्हापूरची चित्रपट परंपरा आणि येथील चित्रनगरीची गरज पाहता कोल्हापूरला वगळून मुंबईतील चित्रनगरीचा विकास करता येणार नाही. हा विकास लवकरात लवकर व्हावा यासाठी आम्हीही शासनाकडे बैठकीची वेळ मागितली आहे. महामंडळालादेखील या सगळ्या विकास प्रक्रियेत विश्वासात घेतले जावे, ही आमची अपेक्षा आहे. - विजय पाटकर, अध्यक्ष, अखिल भारतीय मराठी चित्रपट महामंडळ