फुलेवाडी : फुलेवाडी रिंगरोडवरील गंगाई लॉन येथे वीस लाख लिटर पाणी क्षमता असणारी पाण्याच्या टाकीची अवस्था असून अडचण नसून खोळंबा, अशी झाली आहे. टाकीचे काम २००९-१० साली पूर्ण झाले; पण आजअखेर त्यामध्ये एकही थेंब पाणीसाठा केला नसल्याने ती टाकी धूळ खात आहे. सदरची टाकी वापरात घेतल्यास फुलेवाडी रिंगरोडवरील अनेक नगर, कॉलनींमध्ये कमी दाबाने होणाऱ्या पाणी पुरवठ्याची समस्या कायमची निकालात निघण्याची शक्यता आहे. त्यासाठी लोकप्रतिनिधीच्या पाठपुराव्याची आवश्यकता आहे. सध्या फुलेवाडी रिंग रोडवरील सद्गुरु कॉलनी, ज्योतिर्लिंग कॉलनी, शिवशक्तीनगर, मातंग वसाहत, जि. प. कॉलनी, शिंदे कॉलनी, शिवदत्त कॉलनी, गणेश पार्क, धनगरवाडा, बोंद्रे नगर, गजानन कॉलनी, माहेश्वरी कॉलनी, गडकरी कॉलनी येथे कमी दाबाने पाणी पुरवठा होतो. फुलेवाडीच्या पाण्याच्या टाकीतून पाणी पुरवठा सुरू केल्यास या कॉलनी, नगरामध्ये सुरळीत पाणी मिळू शकते.
संपूर्ण शहराला सन २००२ पासून शिंगणापूर पाणी योजनांचे पाणी सुरू आहे. त्यावेळेची उपनगराची वाढत्या लोकसंख्येची परिस्थिती पाहून फुलेवाडी पाणी टाकी बांधण्यात आली. रोडवरील सर्व नगरे व कॉलन्यांना मुबलक पाणी मिळण्यासाठी संपूर्ण रिंगरोडवरती पाइपलाइन टाकण्यात आली आहे; पण टाकीमध्ये पाणीच साठवले नसल्याने उपनगराला आपटे नगर पंपिंगमधूनच पाणी पुरवठा होत आहे. शिंगणापूर पाणी योजनेवरील ताण वाढल्याने सदरच्या टाकीत साठाच केला गेला नसल्याचे सांगितले जाते; मात्र उपनगरातील वारंवार होणारा विस्कळीत पाणी पुरवठा सुरळीत करायचा असेल तर या टाकीत पाणीसाठा करण्याची गरज आहे.
फोटो : ०८ फुलेवाडी पाणीटाकी
ओळ : फुलेवाडी रिंगरोड वरील बंद असलेली पाण्याची टाकी (छाया : सागर चरापले)