पन्हाळा : तालुक्यातील ३९ ग्रामपंचायतींसाठी मतदान ८२ टक्के झाले असले तरी, तालुक्यातील लक्षवेधी कोडोली ग्रामपंचायतीमध्ये ६६, तर कळे ग्रामपंचायतीमध्ये ८९ टक्के मतदान झाले. पन्हाळा तालुक्यात ३९ ग्रामपंचायतींसाठी १५६ मतदान केंद्रांवर ३८२ उमेदवार निवडून येण्यास मतदान शांततेत पार पडले.
तालुक्यात कळे व कोडोली या दोन ग्रामपंचायती लोकसंख्येने मोठ्या आहेत. या ठिकाणी कळे ग्रामपंचायतीमध्ये उत्साहात ८९ टक्केपर्यंत मतदान झाले, तर कोडोली ग्रामपंचायतीमध्ये मतदारांत निरुत्साह दिसून आला. केवळ ६६ टक्के मतदान झाल्याने या ठिकाणी काय होणार याची उत्सुकता लागून राहिली आहे. ग्रामीण भागाचा कणा असलेल्या ग्रामपंचायतींवर वर्चस्व प्रस्थापित करण्यासाठी सर्वच राजकीय पक्ष व नेत्यांनी सर्व ताकद पणाला लावली आहे.
राज्यात महाविकास आघाडीचे सरकार सत्तेत आल्यापासून ग्रामीण भागातील ही पहिलीच मोठी निवडणूक असल्याने या निवडणुकीचा कौल सत्ताधाऱ्यांसाठी महत्त्वाचा असेल. मतमोजणी सोमवारी होईल. ग्रामपंचायतींच्या निवडणुका या राजकीय पक्षांच्या चिन्हांवर लढवल्या जात नाहीत. यामुळे कोणत्या पक्षाला किती जागा मिळाल्या हे समजत नाही. सर्वच राजकीय पक्षांकडून, आम्हीच जास्त जागा जिंकल्या, असा दावा केला जातो.