कोल्हापूर : महानगरपालिका निवडणुकीत युवक काँग्रेसमधील जास्तीत-जास्त कार्यकर्त्यांना संधी देण्याचा आपला प्रयत्न राहील, अशी ग्वाही पालकमंत्री सतेज पाटील यांनी येथे युवक काँग्रेसच्या कार्यक्रमात बोलताना दिली.
महाराष्ट्र प्रदेश युवक काँग्रेस आयोजित ‘चलो वाॅर्ड’ अभियानअंतर्गत संपर्क अभियान, विकास कामांचे उद्घाटन व कोपरा सभेत पालकमंत्री बोलत होते. यावेळी आमदार चंद्रकांत जाधव, आमदार ऋतुराज पाटील, शहर युवक काँग्रेसचे अध्यक्ष दीपक थोरात, माजी नगरसेवक सचिन चव्हाण, प्रताप जाधव, इंद्रजित बोंद्रे, किरण पोवार, उमेश पोर्लेकर, उदय पवार उपस्थित होते.
पालकमंत्री पाटील यांनी, संपर्क अभियान आमदार जाधव यांना सोबत घेऊन शहरातील ८१ प्रभागांत राबवावे, असे आवाहन केले. प्रारंभी जिल्हा प्रभारी इंद्रजित साळुंखे यांनी अभियानची माहिती दिली. उत्तर विधानसभा युवक अध्यक्ष स्वप्नील सावंत यांनी प्रास्ताविक केले.