अज्ञात वाहनांच्या धडकेत एक ठार

कासारपुतळे (ता.राधानगरी) येथील राजेंद्र सावंत हे आज बुधवारी (दि. ५) दुपारी बाराच्या सुमारास कामानिमित्त हिरो होंडा सी.डी.डॉन मोटारसायकल (नं.एमएच ०८एम ४९३३)वरुन गारगोटीकडे जात होते. ते कोल्हापूर - गारगोटी रस्त्यावर मडिलगे बुद्रुक फाट्याजवळ असलेल्या नटराज मॉलसमोर आल्यावर त्याच्या मोटारसायकलीस कोणत्या तरी अज्ञात वाहनाने धडक दिली. या धडकेत ते गंभीर जखमी झाले परंतु धडक मारलेले वाहन न थांबता गेल्याने ते जखमी अवस्थेत पडून राहिले. लॉकडाऊन असल्याने रस्त्यावर तुरळक वाहतूक सुरू होती. त्यांना उपचारासाठी दवाखान्यात नेले असता उपचारापूर्वीच त्यांचा मृत्यू झाला. वारकरी असलेले राजेंद्र सावंत हे गरीब कुटुंबातील आहेत. मारुती व्हॅन गाडीने ते खासगी प्रवासी वाहतूक करून कुटुंबाचा उदरनिर्वाह चालवत होते. त्यांच्या अपघाती निधनाने त्यांच्या कुटुंबावर डोंगर कोसळला आहे.त्यांच्या पश्चात पत्नी, मुलगा,विवाहित मुलगी,भाऊ असा परिवार आहे.