राधानगरीचा पुढचा आमदार भाजपचाच

चंद्रकांतदादा पाटील : राधानगरीत भाजप कार्यकर्ता आभार मेळावा

राधानगरी : पंतप्रधान नरेंद्र मोदी आणि देवेंद्र फडणवीस प्रचंड मेहनत घेऊन सर्वसामान्य लोकांसाठी काम करीत आहेत. त्यामुळेच सर्वत्र भाजपला यश आले. राधानगरी तालुक्यात ऐनवेळी तयारी करूनही जिल्हा परिषद व पंचायत समिती निवडणुकीत चांगली मते मिळाली. पुढील दोन वर्षांत त्यामध्ये वाढ होण्यासाठी नियोजन केले आहे. कोणत्याही परिस्थितीत २०१९ च्या विधानसभा निवडणुकीत राधानगरी-भुदरगड मतदासंघातून आमदार भाजपच्या चिन्हावर विजयी झाला पाहिजे. यासाठी आतापासूनच प्रयत्न सुरू करा, असे आवाहन पालकमंत्री चंद्रकांतदादा पाटील यांनी केले. राधानगरी तालुका भाजपच्यावतीने आयोजित कार्यकर्त्यांच्या आभार मेळाव्यात ते बोलत होते. यावेळी पाटील म्हणाले, केंद्रातील व राज्यातील सरकार सर्वसामान्य जनतेच्या उत्कर्षासाठी आहे. आघाडी करून शेतकऱ्यांना सशक्त करण्याचे नियोजन सुरू आहे. सुधारित तंत्रज्ञान वापरून शेतीतील उत्पन्न वाढविण्याबरोबरच २२ प्रकारची पिके किमान हमी भावाने खरेदी करण्यात येतील. शेतकऱ्यांना कर्जमाफी देऊनच त्यांना पुन्हा कर्जच घ्यावे लागणार नाही, अशी व्यवस्था निर्माण करू, असा विश्वास त्यांनी व्यक्त केला. यावेळी ‘गोकुळ’चे संचालक बाबा देसाई यांनी मनोगत व्यक्त केले. तालुका अध्यक्ष दीपक शिरगावकर यांनी प्रास्ताविक केले. त्यानंतर तालुक्यातील विविध समस्या सोडविण्यासाठी विनंती केली. त्यानंतर नागरिकांची निवेदने स्वीकारून त्याबाबत कार्यवाहीचे आश्वासन पालकमंत्री पाटील यांनी दिले. यावेळी माजी जि. प.चे शिक्षण व अर्थ समिती सभापती जगदीश लिंग्रस, व्ही. टी. जाधव, तानाजीराव चौगले, संभाजी आरडे, डॉ. सुभाष जाधव, शुभांगी आरडे यांच्यासह नागरिक मोठ्या संख्येने उपस्थित होते. (प्रतिनिधी) वेगळ्या विचारांचा पक्ष तालुक्यातील धामणी प्रकल्पासाठी १२०० कोटींची तरतूद केल्याने या कामाला लवकरच सुरुवात होईल. महिन्यातून एक दिवस पूर्णवेळ थांबून लोकांच्या अडचणी सोडविण्यासाठी राधानगरी येथे कार्यालय सुरू करण्याची घोषणा मंत्री पाटील यांनी केली. २०१९ ची विधानसभा निवडणूक सहा महिने अगोदर लोकसभेबरोबर होणार आहे.