कोल्हापूर-पुणे, सातारा, मिरज, सांगली या मार्गावरील पॅसेंजर रेल्वे सेवा मध्य रेल्वेकडून दिली जाते. कोरोनापूर्वी या पॅसेंजरमधून रोज सुमारे पाच हजारजण प्रवास करत होते. त्यात नोकरदार, छोटे व्यावसायिक, व्यापारी, विद्यार्थी, सर्वसामान्य नागरिकांचा समावेश होता. कोरोनाच्या प्रादुर्भावामुळे गेल्यावर्षी मार्चपासून पॅसेंजर रेल्वेची सेवा बंद झाली. ही सेवा अद्याप सुरू झालेली नाही. त्यामुळे एस.टी. बसेससह अन्य पर्यायी वाहतूक व्यवस्थेचा या प्रवाशांना आधार घ्यावा लागत आहे. मुंबईतील लोकल सुरू झाल्याच्या धर्तीवर कोल्हापूरमधील पॅसेंजर रेल्वेसह मासिक पासची सुविधा सुरू करण्याची मागणी प्रवाशांतून होत आहे.
सध्या सुरू असलेल्या स्पेशल ट्रेन
कोल्हापूर-तिरूपती
कोल्हापूर-मुंबई (महालक्ष्मी एक्स्प्रेस)
कोल्हापूर-मुंबई (कोयना एक्स्प्रेस)
कोल्हापूर-अहमदाबाद
कोल्हापूर- दिल्ली
कोल्हापूर-नागपूर
कोल्हापूर-धनबाद
कोल्हापूर-गोंदिया
मुंबईत सवलत, आम्हाला का नाही?
कोरोना प्रतिबंधक लसीचे दोन्ही डोस घेतलेल्यांना रेल्वे प्रवासाचा मासिक पास दिला जात आहे. मग, आम्हाला का नाही?, असा प्रश्न कोल्हापूर, हातकणंगले, मिरज, सांगली, जयसिंगपूर येथील प्रवाशांकडून उपस्थित करण्यात आला आहे.
भुर्दंड किती दिवस सहन करायचा?
पुणे विभागीय रेल्वे सल्लागार समिती सदस्य आणि अधिकाऱ्यांची गुरुवारी पुणे येथे बैठक झाली. त्यात कोल्हापूर, सांगली, मिरज येथील प्रवाशांची गैरसोय टाळण्यासाठी पॅसेंजर सेवा लवकर सुरू करण्याची मागणी केली आहे.
- शिवनाथ बियाणी, कोल्हापूर.
गेल्या २५ वर्षांपासून मिरजहून कोल्हापूरला पॅसेंजर रेल्वेद्वारे येत आहे. ही सेवा बंद असल्याने आम्हा प्रवाशांची मोठी गैरसोय होत आहे. मुंबईच्या धर्तीवर कोल्हापूरची पॅसेंजर रेल्वे सेवा लवकर सुरू करावी.
-इम्तियाज अली शेख, मिरज.
वेळेची बचत आणि आर्थिकदृष्ट्या विचार करता रेल्वे आम्हाला उपयुक्त ठरते. पॅसेंजर सेवा बंद असल्याने आमची अडचण होत असून, आर्थिक भुर्दंडदेखील बसत आहे. कोरोनाचा प्रादुर्भाव कमी झाल्याने पॅसेंजर सेवा पूर्ववत सुरू करण्यात यावी.
- उदय मोरे, हातकणंगले.
प्रतिक्रिया
कोल्हापूरमधून विविध मार्गांवर सहा पॅसेंजर रेल्वेची सेवा आहे. पण, सध्या त्यांची सेवा बंद आहे. पॅसेंजर रेल्वेची सेवा सुरू करण्याबाबत मध्य रेल्वेच्या विभागाच्या आदेशानुसार कार्यवाही करण्यात येईल.
-ए. आय. फर्नांडिस, प्रबंधक, श्री छत्रपती शाहू महाराज टर्मिनस
240921\24kol_7_24092021_5.jpg
डमी (२४०९२०२१-कोल-लोकमत डमी१२१८)