हातकणंगले : तालुक्यामध्ये जमीन, मालमत्ता, वाहन, व्यवसाय यासह सर्वच क्षेत्रामध्ये खासगी सावकारी फोफावली आहे. बेरोजगार युवक, गावगुंड आणि खासगी भिशी चालकांच्या टोळक्याच्या माध्यमातून व्याजावर व्याज वसुलीचा मोठा व्यवसाय जोर धरत असून तालुका सहकार विभागाकडून कार्यालयाकडे तक्रारीच दाखल नसल्याचा निर्वाळा दिला जात आहे. यामुळे खासगी सावकारीवर अंकुश कोणाचा, याबाबत प्रश्नचिन्ह निर्माण झाले आहे.
तालुक्यामध्ये ७६ सावकारांची नोंदणी उपनिबंधक कार्यालयाकडे आहे. प्रत्येकवर्षी सावकरी परवाना नूतनीकरण करताना वर्षभर गुंतवलेल्या भांडवलाच्या प्रमाणात शासनाला फी परतावा भरणा करून परवाना नवीन घेतला जातो. शासनमान्य सावकारापेक्षा चोरीचुपे सावकारी करणाऱ्यांची संख्या वाढत आहे. खासगी सावकारांकडून सुशिक्षित बेरोजगार, गावगुंड, खासगी भिशी चालक यांना कामाला जुंपले जात आहे. अशा टोळक्याकडून धमकावणे, बळजबरी करणे, लुबाडणूक करणे, दस्तऐवज लिहून घेणे असे प्रकार राजरोस सुरू असून समाजातील प्रतिष्ठा, बेअब्रू आणि नाचक्कीच्या भीतीपोटी अनेक गरजू तक्रारीला फाटा देत आहेत.
चौकट
सहकारी संस्थांचे लेखापरीक्षक नेमण्याचे अधिकार संस्था चालकांना दिले असल्यामुळे याचा गैरफायदा संस्थाचालक घेत असून तालुक्यातील मोठ्या लोकसंख्येच्या गावामधील सहकारी पतसंस्था, अन्य सहकारी संस्थांकडील शिल्लक रकमा, सभासद वर्गणी, बुडित ठेवीचा वापर खासगी सावकारीसाठी केला जात आहे. संस्थाचालकाच्या पाठिंब्यावर हा व्यवसाय जोम धरत असून नाममात्र गहाण खत करून लाखो रुपयांचा निधी सावकारी पाशामध्ये अडकविला जात आहे. यावरही सहकार विभागाने लक्ष देण्याची गरज आहे.
कोट
=
खासगी सावकारीतून पिळवणूक आणि सहकारी संस्थांकडील निधी सावकारीमध्ये याबाबत आपल्या कार्यालयाकडे तक्रारी दाखल नाहीत. खासगी सावकारीमध्ये अडकलेली कुटुंबे, व्यक्ती यांनी तालुका सहकार विभागाकडे तक्रारी दाखल कराव्यात, तात्काळ कारवाई करून सावकारावर गुन्हे दाखल करू तक्रारदारांनी पुढे येण्याची गरज आहे.
- डॉ. प्रगती बागल . उपनिबंधक सहकारी संस्था हातकणंगले