कोल्हापूर : येथील लक्ष्मीपुरी, शिवाजी रोडवरील स्टार लाईट मोबाईल शॉपी चोरट्यांनी फोडून सुमारे ३५ लाख किमतीचे मोबाईल हॅँडसेट लंपास केल्याचा प्रकार आज, शनिवारी सकाळी उघडकीस आला. लक्ष्मीपुरी पोलीस ठाण्यापासून हाकेच्या अंतरावर ही घरफोडी झाल्याने व्यावसायिकांमध्ये खळबळ उडाली आहे. पोलिसांनी सांगितले, शिवाजी रोडवर अब्दुल रशीद महंमद हनिफ बागवान (वय ४८, रा. घाटगे कॉलनी, कदमवाडी) यांची स्टार लाईट मोबाईल शॉपी आहे. नेहमीप्रमाणे काल, शुक्रवारी दहाच्या सुमारास ते दुकान बंद करून घरी गेले. आज सकाळी साडेनऊच्या सुमारास दुकान उघडण्यासाठी आले असता कुलपे तोडून शटर अर्धवट उचकटलेले दिसले. शटर उघडून त्यांनी आतमध्ये पाहिले असता मोेबाईलचे बॉक्स विस्कटलेले दिसून आले. त्यांनी लक्ष्मीपुरी पोलिसांना कळविले. पोलिसांनी पंचनामा केला. चोरट्यांनी बॉक्समधील मोबाईल हॅँडसेट घेऊन चार्जर व माहितीपुस्तिका तिथेच टाकून दिली होती. दुकानात सुगंधी स्प्रे मारल्याने श्वान आतमध्ये जाऊ शकले नाही. ठसेतज्ज्ञांनी काचेवरील बोटांचे ठसे घेतले आहेत. सुमारे ३५ लाख किमतीचे २०० च्यावर मोबाईल हॅँडसेट चोरीला गेल्याची शक्यता पोलिसांनी वर्तवली आहे. (प्रतिनिधी)
मोबाईल शॉपी फोडली
By admin | Updated: September 21, 2014 00:51 IST