पेठवडगाव: दोन दिवसांच्या वीकेंड लॉकडाऊननंतर नागरिकांनी बाजारात खरेदीसाठी गर्दी केली.त्यामुळे वडगावचा आठवडी बाजार बंद असला तरी मिनी बाजार भरला.यामध्ये फिजिकल डिस्टन्सिंग व विनामास्क नागरिक रस्त्यावर उतरल्यामुळे शासकीय आदेश व स्वयंशिस्तीचा फज्जा उडाला.आज शहरात आठ कोरोनाबाधित रुग्ण मिळून आले.तर शहरातील १८ रुग्णांवर उपचार सुरू आहेत.
दोन दिवस बंद तसेच गुढीपाडव्याच्या पार्श्वभूमीवर खरेदीसाठी गर्दी झाली होती.नेहमी सोमवारी खरेदीला जायचे हा येथील नागरिक व महिलांचा पायंडा आहे.त्यामुळे सकाळपासून खरेदीसाठी गर्दी मोठ्या प्रमाणात झाली होती.एसटी स्टॅण्ड, धान्य लाईन, भाजी मंडई, पद्मारोडवर गर्दीचा उच्चांक रात्री उशिरापर्यंत होता.तर सरसकट दुकाने ही सुरू होती.
याप्रकरणी पोलिसांनी नेहमीप्रमाणे कारवाईचा धडाका लावला.तर ध्वनिक्षेपकावरून कोरोना विषयक नियमांची माहिती पालिका,पोलीस प्रशासनाकडून देण्यात येत होती; मात्र यास नागरिक दाद देत नव्हते.
पालिकेच्या वतीने कोरोनाबाधित रुग्णांची माहिती देण्यात येते.यामध्ये आज ८ व १८ जणांवर उपचार सुरू असल्याचे सांगण्यात येत असले तरी अनधिकृत रुग्णसंख्या मोठ्या प्रमाणात आहे.
आज पोलीस प्रशासनाने पालिका मदतीने २० जणांवर विनामास्क कारवाई केली.पोलीस निरीक्षक संतोष घोळवे यांनी बाजारपेठेत फिजिकल डिस्टन्सिंग पाळण्याचे आवाहन केले.
फोटो ओळ: पेठवडगाव येथील पद्मारोडवर खरेदीसाठी मोठी गर्दी झाली होती.त्यामुळे फिजिकल डिस्टन्सिंगचा फज्जा उडाला होता.(छाया: संतोष माळवदे)