लोकमत न्यूज नेटवर्क
मलकापूर : शाहूवाडी तालुक्यातील सर्वांत मोठी बाजारपेठ असलेल्या मलकापूर शहरातील आठवडी बाजार बंद ठेवण्याचा आदेश तहसीलदार गुरू बिराजदार यांनी मलकापूर नगरपलिका प्रशासनाला दिला आहे. त्यामुळे आठवडी बाजार बंद राहणार असून, याची नोंद व्यापारी, किरकोळ विक्रेत्यांनी घ्यावी, असे आवाहन पालिकेचे प्रभारी मुख्याधिकारी स्वरूप खारगे यांनी केले आहे.
कोरोनाच्या पार्श्वभूमीवर बाजारात नागरिकांनी गर्दी करू नये, गर्दीतून कोरोनाचा प्रसार होऊ नये यासाठी पालिका प्रशासनाने दक्षता घेतली आहे. बाजारादिवशी मलकापूर शहरात ग्रामीण भागातून खरेदीसाठी नागरिक येत असतात. सोशल डिस्टन्सिंगचा फज्जा उडतो. त्यामुळे कोरोना संक्रमण होऊन रुग्णसंख्या वाढत आहे. त्यामुळे पालिका प्रशासनाने आठवडी बाजार बंद ठेवण्यात येणार असल्याचे एका प्रसिद्धीपत्रकाद्वारे जाहीर केले आहे.