महाडिक विजयी; मंडलिकांना धक्का

कोल्हापूर : अत्यंत चुरशीने व उत्कंठावर्धक झालेल्या लढतीत कोल्हापूर मतदारसंघातून राष्टÑवादी कॉँग्रेसचे धनंजय भीमराव महाडिक हे ३३ हजार २५९ एवढ्या मताधिक्याने विजयी झाले. खासदार सदाशिवराव मंडलिक यांचे पुत्र व शिवसेनेचे उमेदवार प्रा. संजय मंडलिक यांचा त्यांनी पराभव केला. गेली १६ वर्षे लोकसभेत निर्विवाद प्रतिनिधित्व केलेल्या आणि गेल्या निवडणुकीत अपक्ष म्हणून निवडून येत आपली राजकीय ताकद सिद्ध करणार्‍या मंडलिक गटाला पराभवामुळे जबरदस्त हादरा बसला आहे. कोल्हापूर मतदारसंघात झालेल्या एकूण १२ लाख ६० हजार २९८ मतदानापैकी राष्टÑवादीच्या महाडिक यांना ६ लाख ०७ हजार ६६५, तर शिवसेनेच्या मंडलिक यांना ५ लाख ७४ हजार ४०६ मते मिळाली. देशभरातील मोदी लाटेत कॉँग्रेस आणि राष्टÑवादी कॉँग्रेसचा दारुण पराभव होत असताना कोल्हापूरच्या जनतेने मात्र राष्ट्रवादीला पसंत केले. गेल्या निवडणुकीत शरद पवार यांच्या विरोधात शड्डू ठोकणार्‍या खा. मंडलिक यांना कोल्हापूरच्या जनतेने निवडून दिले होते. मात्र, त्याच जनतेने या निवडणुकीत मंडलिक कुटुंबातील सदस्याला पराभवाचा धक्का दिला. कॉँग्रेस आघाडी विरोधात वातावरण असतानाही धनंजय महाडिक यांच्या लोकोपयोगी समाजकार्य, लोकसंग्रह, युवाशक्तीच्या कार्यकर्त्यांचे जाळे, भागीरथी महिला मंडळाच्या माध्यमातून केलेले महिलांचे संघटन आणि थेट मतदारांशी संवाद साधल्यामुळे राष्टÑवादीला विजय मिळविणे सोपे झाले. याचबरोबर कॉँग्रेस, राष्टÑवादी, आरपीआय, जनसुराज्य, आदी पक्षांच्या कार्यकर्त्यांनी केलेल्या प्रामाणिक प्रयत्नांचाही राष्टÑवादीच्या विजयाला हातभार लागला. महाडिक यांच्या विजयात करवीर, राधानगरी व कोल्हापूर दक्षिण या विधानसभा मतदारसंघांतील मतदारांचा मोठा वाटा राहिला. विशेष म्हणजे शिवसेनेचे आमदार चंद्रदीप नरके प्रतिनिधित्व करीत असलेल्या करवीर विधानसभा मतदारसंघातून धनंजय महाडिक यांना तब्बल ३४ हजार ५७९ एवढे मताधिक्य मिळाल्याने अनेकांच्या भुवया उंचावल्या आहेत. या ठिकाणी कॉँग्रेसचे जिल्हाध्यक्ष पी. एन. पाटील यांची भूमिका अत्यंत महत्त्वाची ठरली. महाडिक यांच्या मदतीला राधानगरी विधानसभा मतदारसंघातील मतदारही धावून गेल्याचे स्पष्ट झाले. गतवेळच्या निवडणुकीत राधानगरी मतदारसंघाने खा. मंडलिक यांच्या पदरात भरभरून मते टाकली होती. मात्र, यावेळी मतदारांनी मंडलिकपुत्राला मोठ्या फरकाने डावलले. महाडिक यांना या मतदारसंघात २३ हजारांहून अधिक मताधिक्य मिळाले. राष्टÑवादीच्या ताब्यात असलेल्या चंदगड विधानसभा मतदारसंघातून शिवसेनेच्या मंडलिक यांना १९ हजार ६५७ इतके मताधिक्य मिळाले. कागल मतदारसंघातही मंडलिक यांनी ९१४६ एवढे मताधिक्य घेतले. कोल्हापूर उत्तरमधून मंडलिक यांना अवघे ३८८५चे मताधिक्य मिळाले. दक्षिण मतदारसंघात मात्र धनंजय महाडिक यांना अपेक्षेइतके मताधिक्य मिळाले नाही. सतेज पाटील यांचा हा मतदारसंघ असून, लोकसभा निवडणुकीच्या पार्श्वभूमीवर पाटील, महाडिक आपापसातील राजकीय वैरत्व संपवून दोघे मतदारांसमोर गेले होते. मात्र, ते मतदारांना रुचले नसल्याने केवळ ९१४६ एवढे मताधिक्य येथे मिळाले. ‘शेकाप’चे संपतराव पवार पाटील (१३१६२), भारिप बहुजन महासंघाचे अतुल दिघे (७०६७), ‘आप’चे नारायण पोवार (५४९५) यांचा दारूण पराभव झाल्याने त्यांना अनामत रक्कमही गमवावी लागली. (प्रतिनिधी)