कोल्हापूर महानगरपालिका निवडणुकीसंदर्भात शहर काँग्रेसच्या प्रमुख पदाधिकाऱ्यांची बैठक काँग्रेस समिती कार्यालयात आयोजित करण्यात आली होती. काँग्रेस पक्षाने ही निवडणूक स्वतंत्र लढवावी तसेच निवडून आल्यानंतर महाआघाडी करून महापालिकेत सत्ता स्थापन करावी, असा सूर या बैठकीत पदाधिकाऱ्यांमधून उमटला.
महानगरपालिकेत काँग्रेसची सत्ता येण्यासाठी सक्षम तसेच जनाधार असलेल्या उमेदवारांना पक्षाचे तिकीट द्यावे, असे आवाहनही यावेळी करण्यात आले. पालकमंत्री सतेज पाटील, प्रदेश उपाध्यक्ष आमदार पी. एन. पाटील, आमदार चंद्रकांत जाधव, आमदार ऋतुराज पाटील, शहराध्यक्ष प्रल्हाद चव्हाण या नेत्यांनी निवडणूक पूर्व किंवा निवडणुकीनंतर जो काही आघाडीसंदर्भात निर्णय घेतील त्यास सर्व पदाधिकाऱ्यांनी सहमती दर्शविली.
यावेळी ब्लॉक अध्यक्ष संपतराव पाटील, सरलाताई पाटील, संध्या घोटणे, वैशाली महाडिक, महंमद शरिफ शेख, संग्राम गायकवाड, लीला धुमाळ, पार्थ मुंडे, सर्फराज रिकिबदार यांनी आपली मते मांडली तर किरण मेथे, मुनाफ बेपारी, आकाश शेलार, सुजित देसाई, अन्वर शेख, मंगल खुडे, पूजा आरडे, हेमलता माने, विद्या घोरपडे, निर्मल सालढाणा, उज्वला चौगुले, सौ.शेजवळ, यशवंत थोरात आदी पदाधिकारी उपस्थित होते. प्रारंभी किशोर खानविलकर यांनी स्वागत केले तर डॉ. प्रमोद बुलबुले यांनी आभार मानले.