बेळगाव :
महाराष्ट्रातील नेत्यांनी अथवा कोणत्याही पक्षाने बेळगावात येऊन मराठी भाषिक उमेदवाराविरुद्ध प्रचार करण्याची बेइमानी करू नये. मराठी माणसांची येथे जी एकजूट होताना दिसत आहे, त्यामध्ये मिठाचा खडा टाकण्याचा प्रयत्न करू नये. जर मदत करता येत नसेल तर निदान तोडफोड तरी करू नका, असे आवाहन शिवसेनेचे नेते आणि खासदार संजय राऊत यांनी केले.
बेळगाव लोकसभा पोटनिवडणुकीतील शिवसेना समिती युतीचे उमेदवार शुभम शेळके यांच्या प्रचारार्थ बेळगावला आलेल्या खासदार संजय राऊत यांनी आज सकाळी पत्रकार परिषदेमध्ये आवाहन केले.
भाजप उमेदवाराच्या प्रचारासाठी काल मुख्यमंत्री येडियुरप्पा आले होते. आज भाजपचे नेते व केंद्रीय मंत्री नितीन गडकरी बेळगावला येत आहेत. भाजप आपली पूर्ण ताकद लावत आहे. काँग्रेस अथवा भाजपने ताकद लावली, यावर आक्षेप घेण्याचे कारण नाही. मात्र, महाराष्ट्रातील नेत्यांनी अथवा कोणत्याही पक्षाने येथे येऊन मराठी भाषिक उमेदवाराविरुद्ध प्रचार करण्याची बेइमानी करू नये. भारतीय जनता पक्षाच्या लोकांचा या चळवळीशी तसा संबंध नाही. भावनिक गुंतवणूक नाही. तथापि मराठी म्हणून तरी तुम्ही येथील मराठी बांधवांसाठी हे पाप करू नका, असे माझे त्यांना आवाहन आहे, असे खासदार संजय राऊत म्हणाले.
कालची मिरवणूक व सभेचे चित्र पाहता भाजप व महाराष्ट्र एकीकरण समिती यांच्यात थेट लढत होईल, असे मला वाटते. खूप वर्षांनंतर अशी थेट लढत होत असून, महाराष्ट्र एकीकरण समिती व शिवसेनेला मानणारा मतदार ताकदीने उतरला, मजबुतीने उतरला तर शुभम शेळके हे नक्की शिवसेना समितीचे लोकसभेतील १९वे आमदार आणि संसदेतील २२वे खासदार असतील.
यावेळी खासदार धैर्यशील माने, मध्यवर्ती महाराष्ट्र एकीकरण समितीचे दीपक दळवी, शिवसेना संपर्कप्रमुख अरविंद नागणुरी, जिल्हाप्रमुख प्रकाश शिरोळकर, कार्याध्यक्ष मनोहर किणेकर, सरचिटणीस मालोजी अष्टेकर, संग्राम कुपेकर, मदन बामणे, श्रीराम सेना हिंदुस्तानचे अध्यक्ष रमाकांत कोंडुसकर, शिवसेना संघटक दत्ता जाधव, यांसह इतर समितीचे कार्यकर्ते मोठ्या संख्येने उपस्थित होते.