कोल्हापूरच्या पेंटरला मारहाण करून लुटले

शून्य क्रमांकाने हा गुन्हा सातारच्या शाहूपुरी पोलीस ठाण्याकडे वर्ग करण्यात आला आहे. दरम्यान, मारहाण करणाऱ्यांनी वाघमारे यांच्याकडून किती ऐवज लुटला,

सातारा : कोल्हापूरहून कामानिमित्त आलेल्या पेंटरला सातारा बसस्थानकाजवळ तीन अनोळखी इसमांनी बेदम मारहाण करून लुटल्याची घटना घडली. यासंदर्भात कोल्हापूर पोलीस ठाण्यात दाखल झालेला गुन्हा शाहूपुरी पोलीस ठाण्याकडे वर्ग करण्यात आला आहे.याबाबत सुजाता दौलत वाघमारे (वय ३८, रा. प्लॉट नं. २२, अ/ ५, यू वॉर्ड, ताराबाई पार्क, कोल्हापूर) यांनी फिर्याद दिली आहे. पोलिसांकडून मिळालेल्या माहितीनुसार, सुजाता यांचे पती दौलत सर्जेराव वाघमारे हे पेंटर म्हणून काम करतात. काही कामानिमित्त शुक्रवारी (दि. २४) ते साताऱ्याला आले होते. काम आटोपून कोल्हापूरला जाण्यासाठी रात्री अकराच्या सुमारास ते सातारा बसस्थानकावर आले. त्यावेळी तीन अनोळखी इसमांनी त्यांना गाठले आणि बेदम मारहाण करून त्यांच्याजवळील ऐवज लुटला. जखमी अवस्थेत दौलत वाघमारे तसेच कोल्हापूरला गेले आणि घडलेला प्रकार पत्नी सुजाता यांना सांगितला. त्यांनी दौलत यांना उपचारांसाठी रुग्णालयात दाखल केले आणि कोल्हापूर पोलीस ठाण्यात फिर्याद दाखल केली. शून्य क्रमांकाने हा गुन्हा सातारच्या शाहूपुरी पोलीस ठाण्याकडे वर्ग करण्यात आला आहे. दरम्यान, मारहाण करणाऱ्यांनी वाघमारे यांच्याकडून किती ऐवज लुटला, याचा तपशील लगेच उघड होऊ शकला नाही. (प्रतिनिधी)