श्रीकांत ऱ्हायकर
धामोड : खामकरवाडी - अवचितवाडीदरम्यान असलेला खामकरवाडी लघु पाटबंधारे प्रकल्प रविवारी मध्यरात्री दहा वाजण्याच्या सुमारास पूर्ण क्षमतेने भरला. त्यामुळे धरणाच्या उजव्या बाजूच्या सांडव्यातून मोठ्या प्रमाणात पाण्याचा विसर्ग होत आहे. हे पाणी तुळशी नदीपात्रात मिसळल्याने नदी पाणी पातळीत मोठी वाढ झाली आहे. तसेच धरणाच्या सांडव्यावरून पडणाऱ्या पाण्याचे विहंगम दृश्य डोळ्यात साठवण्यासाठी नागरिकांची मोठी गर्दी धरण स्थळावर होत आहे.
गेल्या आठ ते दहा दिवसांपासून जिल्ह्यात पावसाने दमदार हजेरी लावल्याने मोठ्या धरणांच्या पाणीसाठ्यात कमालीची वाढ झाली आहे, तर तालुक्यातील छोट्या -मोठ्या प्रकल्पांच्या पाणी पातळीत मोठी वाढ होत आहे. काही प्रकल्प पूर्ण क्षमतेने भरले आहेत.
जूनच्या पहिल्याच आठवड्यापासून पावसाने दमदार एंट्री केल्याने शेतकरी वर्ग सुखावला असून रोप लागणीच्या कामाला सुरुवात झाली आहे.
खामकरवाडी ( ता. राधानगरी ) येथील अवचितवाडी व खामकरवाडी या दोन गावांसाठी वरदान ठरणारा प्रकल्प जुनच्या पंधरवड्यात प्रथमच पूर्ण क्षमतेने भरला आहे. याअगोदर हा प्रकल्प जुलैअखेर अथवा ऑगस्टमध्ये भरत होता. पण हा प्रकल्प प्रथमतःच इतक्या लवकर भरल्याने शेतकरी वर्ग सुखावला आहे. गतसाली हा प्रकल्प लवकरच कोरडा पडल्याने शेती सिंचनासह पिण्याच्या पाण्याचा प्रश्न तीव्र बनला होता. पण गेल्या आठवडाभरापासून पावसाची संततधार सुरू झाल्याने कोरडा पडलेला प्रकल्प रविवारी मध्यरात्री अकराच्या दरम्यान पूर्ण क्षमतेने भरला. या प्रकल्पात ११६२.७८ सहस्र घनमीटर इतका पाणीसाठा होत असून या दोन गावातील लोकांचा पिण्याच्या पाण्यासह शेती सिंचनाच्या पाण्यासाठी हा प्रकल्प वरदान ठरला आहे. प्रकल्प पूर्ण क्षमतेने भरल्याने शेतकरी वर्गातून मोठे समाधान व्यक्त होत आहे.
फोटो ओळी -
खामकरवाडी (ता. राधानगरी ) येथील पाटबंधारे प्रकल्प पूर्ण क्षमतेने भरला असून, सांडव्यातून बाहेर पडणाऱ्या पाण्यासह तलावाचे विहंगम दृश्य.