कागल : कागल तालुका खरेदी विक्री संघ जिल्ह्यातील एक अग्रेसर आणि तालुक्यातील सर्वांत जुना संघ आहे. हा संघ सध्या ऊर्जितावस्थेत आल्याचे बघून समाधान वाटते. कोरोना रुग्णालयासाठी ५० बेड देऊन तालुका संघाने सामाजिक बांधिलकी जोपासली आहे, असे गौरवोद्‌गार जिल्हा बँकेचे संचालक भय्या माने यांनी काढले. संघाची 62 वी वार्षिक सर्वसाधारण सभा येथील मुख्य कार्यालयात झाली, त्यावेळी ते बोलत होते. अध्यक्षस्थानी अध्यक्ष सूर्याजी घोरपडे होते.
विषयपत्रिकेचे वाचन कार्यकारी संचालक हिंदुराव सोळसे यांनी केले. त्यास उपस्थित सभासदांनी मंजुरी दिली. भय्या माने म्हणाले की, खतविक्रीची स्पर्धा गावोगावी असतानाही चांगली विक्री केली आहे. ही शेतकऱ्यांची संघावरील श्रद्धा स्पष्ट करते. केवळ कर्मचारी आणि संचालकांवर ही जबाबदारी न टाकता सभासदांनीही व्यवहार वाढविले पाहिजेत. अध्यक्षीय भाषणात सूर्याजी घोरपडे यांनी संघाच्या प्रगतीचा आढावा घेतला. कर्मचारी वर्गासाठी चांगला निर्णय घेणार असल्याचे जाहीर केले.
या सभेला संचालक शशिकांत खोत, मारुती पाटील, अंकुश पाटील, ज्ञानदेव पाटील, राजू माने, सम्राट सणगर, दत्तात्रय पाटील, नंदकुमार पाटील, अर्जुन मसवेकर, कृष्णा फराकटे, ज्योती मुसळे, जीवन शिंदे, विजयसिंह पाटील, महेश चौगुले, माधुरी मोहन पाटील, पवित्रा प्रकाश पाटील उपस्थित होते. आभार बळवंतराव माने यांनी मानले.
फोटो कॅप्शन :
कागल तालुका खरेदी विक्री संघाच्या 62 व्या वार्षिक सर्वसाधारण सभेत अध्यक्ष सूर्याजी घोरपडे यांचा भय्या माने यांच्या हस्ते सत्कार करण्यात आला.