लोकमत न्यूज नेटवर्क
कोल्हापूर : लोकाभिमुख प्रशासकीय कामकाज करणारे आणि कर्तव्यदक्ष अशी ख्याती असलेले जिल्हाधिकारी दौलत देसाई यांची मुदतपूर्व अचानक बदली केल्यास जनआंदोलन केले जाईल, असा इशारा कोल्हापूर शहर व जिल्हा नागरी कृती समितीने बुधवारी मुख्यमंत्री उद्धव ठाकरे यांना ई - मेलव्दारे दिला. दरम्यान, जिल्हाधिकारी देसाई यांच्या बदलीचे वृत्त प्रसिध्द होताच विविध स्तरातून नाराजीचा सूर उमटला. मुदतपूर्व बदली झाल्यास जनआंदोलन करण्याचीही तयारीही विविध संस्था, संघटना, शेतकरी संघटनांनी केले आहे.
कृती समितीचे अशोक पोवार, रमेश मोरे, भाऊ घोडके, चंद्रकांत सूर्यवंशी, संभाजीराव जगदाळे, विनोद डुणूंग, चंद्रकांत पाटील, अंजूम देसाई, दादा लाड, अॅड. रणजित गावडे, भरत रसाळे, राजेश वरक यांनी हे निवेदन पाठवले आहे. या निवदेनात म्हटले आहे की, दीड वर्षात जिल्हाधिकारी देसाई हे प्रभावीपणे काम करत आहेत. महापूर, कोरोना या आपत्तीत त्यांनी स्वत:चा जीव धोक्यात घालून रात्रं-दिवस प्रशासकीय यंत्रणा कामाला लावली. जनतेला न्याय देण्याचा प्रयत्न केला, मरगळलेले प्रशासन गतिमान केले. महसूलमध्ये पारदर्शकता आणण्यासाठी ते आग्रही आहेत. पाच-सहा किलोमीटर दुर्गम भागात पायपीट करुन लोकांपर्यंत पोहोचून ते सुविधा देण्याचे काम करत आहेत. त्यामुळे त्यांचा कार्यकाल पूर्ण होईपर्यंत त्यांची बदली करु नये.
---
चांगले अधिकारी नको आहेत काय
जिल्हाधिकारी देसाई यांचा कार्यकाल शिल्लक असताना बदलीसाठी प्रयत्न करण्यामागचे गौडबंगाल काय, राजकीय नेत्यांना कोल्हापूरच्या विकासासाठी चांगले अधिकारी ठेवायचेच नाहीत का, असे झाल्यास महाराष्ट्रात हुकुमशाही चालू आहे असा समज होईल, असे समितीने म्हटले आहे.
---