लोकमत न्यूज नेटवर्क कोल्हापूर : जिल्ह्यातील घाट भागात आज, बुधवारी अतिवृष्टीचा इशारा हवामान विभागाने दिला आहे. धरणक्षेत्रातही जोरदार पाऊस कोसळणार असून, नद्यांच्या पाणीपातळीत वाढ होण्याची शक्यता आहे. त्यामुळे घाट भागासह नदी काठावरील नागरिकांनी सतर्क राहावे, असे आवाहन जिल्हाधिकारी राहुल रेखावार यांनी केले आहे. मंगळवारी दिवसभर पावसाची रिपरिप राहिली, धरणक्षेत्रातही जाेरदार पाऊस सुरू असल्याने नद्यांच्या पातळीत वाढ झाली आहे. पंचगंगेची पातळी १५.७ फुटांपर्यंत पोहोचली आहे.
कोल्हापुरात चार-पाच दिवसांपासून पावसाने हजेरी लावली असली, तरी त्यात सातत्य नव्हते. पडेल तिथे पडेल असा पाऊस होतो. सोमवारी सायंकाळ पाऊस वातावरणात बदल झाला. मंगळवारी सकाळपासूनच पावसाला सुरुवात झाली. सकाळी अकरानंतर त्यात वाढ होत जाऊन एकसारखी रिपरिप सुरू राहिली. प्रदीर्घ विश्रांतीनंतर पावसाने सुरुवात केल्याने शेतकऱ्यांना दिलासा मिळाला आहे. हा पाऊस खरीप पिकाला पोषक आहे. माळरान, डोंगरमाथ्यावरील पिकांची वाढ जोमदार होण्यास मदत होणार आहे.
कोल्हापूर शहरातही दिवसभर रिपरिप राहिली. पाऊस व गार वारे वाहत असल्याने वातावरणात कमालीचा गारठा जाणवत होता. बऱ्याच दिवसांनंतर एकसारखा पाऊस सुरू झाल्याने नागरिकांना घराबाहेर पडू वाटत नव्हते. धरणक्षेत्रातही जाेरदार पाऊस सुरू आहे. ‘कुंभी’ धरणक्षेत्रात चोवीस तासांत तब्बल ११७ मिलिमीटर पाऊस झाला. राधानगरीसह इतर धरणांतून विसर्ग सुरू असल्याने नद्यांच्या पाणीपातळीत वाढ झाली आहे. राधानगरीतून प्रतिसेकंद १४०० घनफूट पाण्याचा विसर्ग सुरू असून पंचगंगेची पातळी मंगळवारी पाच वाजता १५.७ फुटांवर होती.
जिरवण्याची पाऊस...
एकदम धो धो कोसळलेल्या पावसाने मोठे नुकसान होते. बांधफुटीसह पिकांच्या वाढीस असा पाऊस उपयुक्त नसतो. त्यापेक्षा आता ज्या पद्धतीने पाऊस सुरू आहे, तसा जिरवण्याची पाऊस अधिक उपयुक्त आहे.
१०७७ टोल फ्री क्रमांक
अतिवृष्टीची शक्यता असली, तरी नागरिकांनी अफवांवर विश्वास ठेवू नये. प्रशासनाच्या सूचनांचे पालन करावे, अतिवृष्टीमुळे आपत्कालीन परिस्थिती निर्माण झाल्यास मदतीसाठी जिल्हा नियंत्रण पक्षाच्या १०७७ टोल फ्री क्रमांकावर संपर्क साधावा, असे आवाहन जिल्हाधिकारी रेखावार यांनी केले आहे.
फोटो ओळी : कोल्हापूर जिल्ह्यात मंगळवारी दिवसभर पावसाची रिपरिप राहिली. राधानगरी धरणातून विसर्ग सुरू झाल्याने पंचगंगा नदीच्या पाणीपातळीत वाढ होत आहे. (फाेटो-०७०९२०२१-कोल-रेन) (छाया- आदित्य वेल्हाळ)नियंत्रण कक्षाचा