सुधारित ... आजची जोतिबा यात्रा रद्द , पालखी सोहळ्यासह धार्मिक विधी होणार

कोल्हापूर : कोरोनाचा वाढता संसर्ग आणि जिल्ह्यात पुकारण्यात आलेली संचारबंदी या पार्श्वभूमीवर पश्चिम महाराष्ट्र देवस्थान व्यवस्थापन समितीने आज, सोमवारी होणारी श्री जोतिबाची चैत्र यात्रा रद्द करण्याचा निर्णय घेतला. दरम्यान, ज्या २१ मानकऱ्यांच्या उपस्थितीत यात्रेतील धार्मिक विधी व मुख्य पालखी सोहळा साजरा केला जाणार होता. त्यातील पाच मानकरी कोरोनाबाधित आढळल्याने एकच खळबळ उडाली आहे.

आता हा सोहळा १६ मानकऱ्यांसह देवस्थान समितीचे कर्मचारी आणि पोलीस कर्मचारी अशा ४५ जणांच्या उपस्थितीत होणार आहे.

कोरोना संसर्गाच्या पार्श्वभूमीवर पश्चिम महाराष्ट्र देवस्थान व्यवस्थापन समितीने जोतिबाच्या चैत्र यात्रेनिमित्त होणारा मुख्य पालखी सोहळा व धार्मिक विधी केवळ २१ मानकऱ्यांच्या उपस्थितीत घेण्याचा निर्णय घेतला. तत्पूर्वी मंदिर परिसरात उपस्थित राहणाऱ्या २१ मानकऱ्यांसह देवस्थान समितीचे कर्मचारी, बंदोबस्तावरील पोलीस कर्मचाऱ्यांची अँटिजेनसह आरटीपीसीआर चाचणी करण्यात आली. त्यात पाच मानकऱ्यांचा अहवाल पाॅझिटिव्ह आला. त्यामुळे देवस्थान समितीचे अध्यक्ष तथा प्रशासक जिल्हाधिकारी दौलत देसाई यांनी केवळ १६ मानकऱ्यांसह एकूण ४५ जणांच्या उपस्थितीत हा सोहळा घेण्याचा निर्णय घेतला आहे. यापूर्वीच यात्रा रद्द करण्याचा निर्णय समितीने घेतला होता.

सलग दुसऱ्या वर्षी ही यात्रा रद्द होत आहे. या पार्श्वभूमीवर जोतिबा डोंगराकडे जाणारे सर्वच रस्ते बंद करण्यात आले आहेत. याशिवाय एक पोलीस अधीक्षक, चार पोलीस निरीक्षकांसह ३०० कर्मचाऱ्यांचा फौजफाटाही शनिवारी मध्यरात्रीपासूनच तैनात करण्यात आला आहे. स्वत: पोलीस अधीक्षक शैलेश बलकवडे यांनी उपअधीक्षक आर. आर. पाटील यांच्यासोबत रविवारी जोतिबा डोंगरावरील बंदोबस्ताची पाहणी केली. डोंगराकडे येणारे तिन्ही रस्ते बॅरिकेड्स लावून बंद करण्यात आले आहेत. हा बंदोबस्त उद्या, मंगळवारी रात्रीपर्यंत असणार आहे. ग्रामस्थांनी जोतिबा डोंगरावर येऊ नये. अन्यथा कारवाईस सामोरे जावे लागेल, याची नोंद घ्यावी, असे आवाहन पोलीस अधीक्षक बलकवडे यांनी केले आहे.

बंदोबस्त असा

पोलीस अधीक्षक (१), पोलीस उपअधीक्षक (१), पोलीस निरीक्षक (४), पोलीस कर्मचारी (८०), स्ट्रायकिंग फोर्स (१०), गृहरक्षक दलाचे जवान (१२०) यांचा समावेश आहे.

चौकट

देवस्थानतर्फे लाईव्ह दर्शनाची सोय

संपूर्ण महाराष्ट्रासह देशाच्या कानाकोपऱ्यातील लाखो भक्तांचे श्री जोतिबा हे श्रद्धास्थान आहे. त्यात संसर्गामुळे सलग दुसऱ्या वर्षी भक्तांना जोतिबाची भेट घेता येणार नाही. त्यामुळे हजारो भक्त दर्शनाची आस लावून बसले आहेत. ही बाब जाणून पश्चिम महाराष्ट्र देवस्थान समितीने यात्रेनिमित्त होणारे धार्मिक विधी व पालखी सोहळ्याचे थेट फेसबुकच्या माध्यमातून प्रसारण करण्याचा निर्णय घेतला आहे. त्यामुळे हा सोहळा आता घरबसल्या भक्तांना https://www.facebook.com/shree-kedarling-chaitra-yatra-2021-111609994400299 यावर पाहता येणार आहे.