शाहू महाराज यांच्यावर शुभेच्छांचा वर्षाव

अंबाबाईचे दर्शन घेऊन ते न्यू पॅलेसवर त्यांनी विद्यार्थी-शिक्षक व मान्यवरांच्या उपस्थितीत केक कापला

कोल्हापूर : श्रीमंत छत्रपती शाहू महाराज यांचा ६७ वा वाढदिवस आज, बुधवारी उत्साहात साजरा झाला. त्यांना शुभेच्छा देण्यासाठी न्यू पॅलेसवर विविध क्षेत्रांतील मान्यवरांची गर्दी झाली होती. दिवसभर त्यांच्यावर शुभेच्छांचा वर्षाव सुरू होता.सकाळी ९ वाजता श्रीमंत शाहू महाराजांनी भवानी मंडप येथील भवानी देवीचे दर्शन घेतले. त्यानंतर अंबाबाईचे दर्शन घेऊन ते न्यू पॅलेसवर गेले. त्या ठिकाणी त्यांनी विद्यार्थी-शिक्षक व मान्यवरांच्या उपस्थितीत केक कापला. त्यानंतर त्यांनी शुभेच्छा स्वीकारायला सुरुवात केली. सर्वप्रथम येथील छत्रपती शाहू विद्यालयाच्या विद्यार्थ्यांनी व शिक्षकांनी त्यांना शुभेच्छा दिल्या. यावेळी संभाजीराजे छत्रपती व मालोजीराजे छत्रपती उपस्थित होते. खासदार धनंजय महाडिक, महापौर तृप्ती माळवी, उद्योगपती अरविंदकुमार रूईया, इतिहास संशोधक डॉ. जयसिंगराव पवार, डॉ. रमेश जाधव, ‘लोकमत’चे संपादक वसंत भोसले, मुख्य प्रतिनिधी विश्वास पाटील, जाहिरात उपव्यवस्थापक राम जोशी, भाजप महानगर जिल्हाध्यक्ष महेश जाधव, महापालिका स्थायी समिती सभापती आदिल फरास, नगरसेवक प्रकाश गवंडी, दिगंबर फराकटे, महेश कदम, माजी विशेष पोलीस महानिरीक्षक रामराव पवार, माजी उपमहापौर विक्रम जरग, संपतराव चव्हाण-पाटील,लाला गायकवाड, किसन कल्याणकर, संताजी घोरपडे आदींसह पुणे येथील शाहू महाराज अध्यक्ष असलेल्या आॅल इंडिया शिवाजी मेमोरियल सोसायटी व शिवाजी मराठा सोसायटी च्या पदाधिकाऱ्यांनी पुष्पगुच्छ देऊन शुभेच्छा दिल्या.(प्रतिनिधी)