कुंभोज : अशोक खाडे :
नेज (ता. हातकणंगले) येथील ग्रामपंचायतीच्या पंचवार्षिक निवडणुकीच्या अकरा जागांसाठी दाखल झालेल्या ४९ उमेदवारी अर्जांपैकी सर्व अर्ज वैध ठरले आहेत. येथे स्थानिक गटांचे प्राबल्य असून, शह-काटशहाच्या राजकारणामुळे पक्षीय आघाड्या विस्कटलेल्या आहेत. त्यातून काॅंग्रेस सोबत भाजप, तर शिवसेना स्वतंत्रपणे लढणार असून, स्वाभिमानी शेतकरी संघटना सध्य:स्थितीत तटस्थ दिसून येत आहे. तथापि, दुसरीकडे बिनविरोध करण्यासाठी सुद्धा सर्व नेतेमंडळी कंबर कसत असून, बिनविरोधची मदार केवळ आता दहा अपक्षांवर येऊन ठेपली आहे.
येथे चार प्रभागांतील अकरा जागांसाठी निवडणूक होत असून, बिनविरोधसाठी सुरुवातीपासूनच नेत्यांनी प्रयत्न सुरू केले होते. त्याला आता गती आली आहे. तिसऱ्या बैठकीदरम्यान अपक्षांकडून बिनविरोधसाठी हात पुढे आल्यास नेते आश्वासक बनले असून, तसे न घडल्यास मात्र निवडणुक होणार हे चित्रही स्पष्ट दिसून येत आहे. येथील गतवेळची लढत काॅंग्रेसचे रवींद्र खोत, भाजपचे बी. एस. गारे तसेच शिवसेनेचे बी. एल. शिंगे , आप्पासाहेब एडके यांच्या आघाडीशी माजी पं. स. सदस्य बी. जे. पाटील, माजी सरपंच सुनील देशमुख, संग्रामसिंह निंबाळकर यांची आघाडी दरम्यान झाली होती. तथापि, बदललेल्या पक्षीय आघाडींनुसार बी. एस. गारे यावेळी शिवसेनेऐवजी काॅंग्रेस आघाडीसोबत राहिले आहेत. बी. जे. पाटील व बी. एस. गारे आघाडीत एकत्र आले आहेत. स्थानिक गट विस्कटले असून, स्वाभिमानीचे तालुकाध्यक्ष आप्पासो एडके यांची मात्र यावेळी थोडी गोची झाली आहे. शिवपुरीत तीन अपक्षांची स्वतंत्र आघाडी होणार आहे. नेज सेवा संस्थेचे अध्यक्ष बाबासाहेब पाटील, आप्पासाहेब एडके यांच्या प्रमुख पुढाकाराने बी. एस. गारे, बी. एल. शिंगे, रवींद्र खोत, सुनील देशमुख, संग्रामसिंह निंबाळकर ही नेतेमंडळी बिनविरोधसाठी कंबर कसत असून, परस्परांत जागा वाटप समजुतीने करण्याचे ठरवून अपक्षांची साथ मिळविण्यासाठी सकाळ-संध्याकाळ बैठका होत आहेत.
एकंदरीत सर्व नेत्यांनी बिनविरोधसाठी बिनशर्थपणे हातात हात दिले आहेत. दहा पैकी दोन अपक्षांनी शुक्रवारी झालेल्या बैठकीकडे पाठ फिरविली. उर्वरितांपैकी विशेषतः तीन अपक्षांना हाताळण्याचे दिव्य नेत्यांपुढे आहे. त्यांच्या प्रतिनिधित्वाबाबत काही विचार झाल्यास निवडणूक बिनविरोध होण्याचा मार्ग सुकर होईल. अन्यथा सर्वजण मिळून अपक्षांविरुद्ध लढतील, असे सार्वत्रिक चित्र दिसून येत आहे.
एकूण प्रभाग- ४
एकूण मतदान- ३७८०
एकूण जागा- ११
चौकट- निवडणुक ग्रामपंचायतीची... किंमत एका मताची..!
तंटामुक्त तसेच ग्रामस्वच्छता अभियानात राज्यस्तरीय बक्षीसपात्र नेज गावची प्रत्येक निवडणुक अटीतटीची होते. २००५ च्या निवडणुकीत तर एका मताधिक्याच्या जोरावर एक जागा अधिक जिंकून ग्रामपंचायतीत सत्तांतर घडले होते. त्यापासून इथल्या गटनेत्यांपासून कार्यकर्ते, उमेदवार तसेच मतदारांत एका मताच्याही किमतीची चर्चा मात्र पंधरा वर्षांनंतर आजही निवडणुकीच्या निमित्ताने गावात होत आहे.