लोकमत न्यूज नेटवर्क
कोल्हापूर : गडचिरोली या नक्षलवादी भागात दोन वर्षांत पोलीस अधीक्षक शैलेश बलकवडे यांनी नक्षलवाद्यांविरुद्ध केेलेल्या उल्लेखनीय कामगिरीची दखल भारत सरकारच्या गृहविभागाने घेतली. त्याबद्दल केंद्रीय गह विभागाच्यावतीने त्यांना "असाधारण असूचना कुशलता पदक'''' जाहीर झाले. तसेच राज्य शासनानेही त्यांच्या खडतर सेवेबद्दल त्यांना ‘विशेष सेवा पदक’ जाहीर केले.
कोल्हापूरचे पोलीस अधीक्षक शैलेश बलकवडे यांनी २०१८ ते २०२० या कालावधीत गडचिरोली पोलीस अधीक्षक पदाची धुरा सांभाळली. त्यांनी तेथे नक्षलवादावर अंकूश ठेवण्यात यश मिळविले. घातपातीच्या तयारीतील नक्षलींचे १० कॅंप उद्ध्वस्त केले होते. यावेळी चकमकीत २० नक्षली ठार करण्यात पथकाला यश मिळाले होते. हिंसक कृत्य करण्याच्या तयारीतील ५३ नक्षलींना अटक केली. दोन वर्षांत ४५ नक्षलींनी आत्मसमर्पण केले. जिल्ह्यातील निवडणुका शांततेत झाल्या. सुमारे चार कोटींचा मद्यसाठा जप्त केला. किष्टापूर नाल्यावरील पुलाचे बांधकाम पूर्ण करण्यासाठी आवश्‍यक सुरक्षा व्यवस्था निर्माण केली. त्यामुळे ३० गावांचा दळणवळणाचा प्रश्‍न मार्गी लागला. बलकवडे यांच्या या उल्लेखनीय कार्याबद्दल त्यांना केंद्रीय गृह खात्याचा ‘असाधारण असूचना कुशलता’ व राज्य शासनाचे ‘विशेष सेवा’ पदक जाहीर झाले.