अटक संशयितांची नावे अशी : ऋतुराज सुनील शिंदे (वय २६, रा. माळवाडी, गडमुडशिंगी, ता. करवीर), महेश बालाजी डोंगळे (२५ रा. छत्रपती कॉलनी, गडमुडशिंगी), रवी राजाराम पोवार (३२ रा. शिरगाव गल्ली, गडमुडशिंगी), तौफिक बाबासाहेब मुल्ला (२८, रा. मदिना कॉलनी, विक्रमनगर), अझरुद्दीन सलिम सय्यद (३२ अष्टविनायक काॅलनी, विक्रमनगर).
पोलिसांनी दिलेली माहिती अशी की, गडमुडशिंगी येथील जमाल मुल्ला यांचा बांधकाम व जमीन खरेदी-विक्रीचा व्यवसाय आहे. दि. ६ सप्टेंबर २०२० रोजी सकाळी पावणेसहा वाजता आपल्या पत्नीसह ते मॉर्निंग वॉकसाठी बाहेर पडले. दोन तासांनी घरी परतले असता घरातील तिजोरीतील सुमारे ८ लाख २० हजारांची रोकड लंपास झाल्याचे लक्षात आले. त्यांनी गांधीनगर पोलीस ठाण्यात घरफोडीची तक्रार दिली.
कोणताही पुरावा नसताना घरफोडी उघडकीस आणणे पोलिसांसमोर आव्हान होते. दरम्यान, स्थानिक गुन्हे अन्वेषणचे हे. कॉ. श्रीकांत मोहिते यांना मिळालेल्या गोपनीय माहितीनुसार पथकाने सापळा रचून शनिवारी दुपारी ऋतुराज शिंदे व महेश डोंगळे यांना संशयावरून गडमुडशिंगीतील टेंबलाई मंदिरनजीक ताब्यात घेतले. खाक्या दाखवताच त्यांनी घरफोडीची कबुली दिली. त्यांच्याकडील माहितीनुसार तौफिक मुल्ला, अझरुद्दीन सय्यद, रवी पोवार यांनाही अटक केली. त्यांनीही संगनमताने ही घरफोडी केल्याची कबुली दिली.
ही कारवाई स्थानिक गुन्हे अन्वेषणचे पो. नि. तानाजी सावंत यांच्या मार्गदर्शनाखाली उपनिरीक्षक विनायक सपाटे, हे. कॉ. श्रीकांत मोहिते, विजय कारंडे, किरण गावडे, वैभव पाटील, कुमार पोतदार, उत्तम सडोलीकर, प्रदीप पोवार, अमर वासुदेव, रणजित कांबळे, अजय काळे, किरण भोगण, राजेंद्र वराडकर, नामदेव यादव यांनी केली.
सीसीटीव्ही चित्रण सापडू नये म्हणून ‘डीव्हीआर’च गायब
घरमालक मुल्ला यांनी घराच्या मुख्य दरवाजाच्या, बेडरूमच्या तसेच तिजोरीच्या चाव्या वेगवेगळ्या ठिकाणी ठेवलेल्या असतानाही चोरट्याने शक्कल लढवून तिन्हीही चाव्या मिळवून रोकड लंपास केली होती. सीसीटीव्ही कॅमेराचे फुटेज मिळू नये म्हणून चोरट्यांनीच ‘डीव्हीआर’च गायब केला होता. त्यामुळे घरफोडीमध्ये घरचा भेदी असण्याची अगर हा चोरीचा बनाव असावा, अशी शंका व्यक्त केली. त्यादृष्टीने तपास करताना घरफोडीचा उलगडा झाला.
फोटो न. २१०२२०२१-कोल-ऋतुराज शिंदे (आरोपी)
फोटो न. २१०२२०२१-कोल-महेश डोंगळे (आरोपी)
फोटो न. २१०२२०२१-कोल-तौफिक मुल्ला (आरोपी)
फोटो न. २१०२२०२१-कोल-अझरुद्दीन सय्यद (आरोपी)
फोटो न. २१०२२०२१-कोल-रवी पोवार (आरोपी)