कोल्हापूर : शहरासह विविध ठिकाणी झालेल्या दुचाकी अपघातांत पाचजण जखमी झाले. या जखमींवर सीपीआर रुग्णालयात उपचार सुरू आहेत. या सर्व घटना गुरुवारी (दि. ३१) रात्री घडल्या.
पहिल्या घटनेत शिवाजी रोडवरील हिरापन्ना दुकानासमोर गुरुवारी रात्री साडेअकरा वाजण्याच्या सुमारास दुचाकी घसरून गौरव भारत पाठकर (वय ३०, रा. संभाजीनगर) हे जखमी झाले. दुसऱ्या घटनेत वडगाव (ता. हातकणंगले) हद्दीत शुक्रवारी रात्री झालेल्या दुचाकी अपघातात अगंद श्रीहरी मोरे (२३, रा. जाडेवाडी, फुलसांगवी, जिल्हा बीड) हा युवक जखमी झाला. तिसऱ्या घटनेत वडगाव हद्दीत गौतम मनोहर खाडे (४८, रा. टोप, ता. हातकणंगले) हे गणेश मंदिर रस्त्यावरून जाताना त्यांच्या दुचाकीला अपघात झाला. यात ते जखमी झाले. चौथ्या घटनेत योगेश भास्कर सोहनी व शैलेश निवृत्ती रेळेकर (३३, रा. उजळाईवाडी) हे दोघे वडगाव फाटा येथे झालेल्या अपघातात जखमी झाले. या सर्वांवर सीपीआर रुग्णालयात उपचार सुरू असून या घटनेची नोंद सीपीआर पोलीस चौकीत झाली आहे.