भडगावजवळ पाच लाखांचा नरक्या पकडला

दोघांना अटक : स्थानिक गुन्हे अन्वेषण विभागाची कारवाई

मुरगूड : भुदरगड तालुक्यातील जंगलातील औषधी वनस्पती नरक्या कोल्हापूर येथे विक्री करण्यासाठी निघालेल्या दोघांना स्थानिक गुन्हे अन्वेषणच्या पोलिसांनी भडगाव (ता. कागल) येथे शिताफीने पकडले. त्यांच्याकडून हौदाच्या टेम्पोसह नरक्याची दहा पोती पोलिसांनी जप्त केली. बाजारभावाप्रमाणे या नरक्याची अंदाजे किंमत पाच लाखांच्या घरात असून, अटक केलेल्या भीमराव महिपती कांबळे (वय ४५) व चालक धनाजी भाऊ झाटे (३८, दोघेही रा. काड्याचा हुडा, ता. भुदरगड) यांच्याकडून आंतरराज्य टोळीचा पर्दाफाश होण्याची शक्यता आहे.याबाबत पोलीस ठाण्यातून मिळालेली माहिती अशी : आज, रविवारी सकाळी साडेअकराच्या सुमारास मुरगूड-कागल रस्त्यावर सहायक पोलीस निरीक्षक विकास जाधव, स.पो.नि. चंद्रकांत मस्के, पोलीस उपनिरीक्षक रमेश ढांगे हे पोलीस कर्मचाऱ्यांसोबत पेट्रोलिंग करीत होते. भडगाव फाट्याजवळ असणाऱ्या एम.एस.ई.बी. कार्यालयासमोर थांबून ते वाहनांची तपासणी करीत होते. त्यावेळी निढोरीकडून कागलकडे जाणाऱ्या हौदा टेम्पो (एमएच ११-ए ६-३५२७)वरील चालक पोलिसांची नजर चुकवून जात होता. त्यावेळी अगदी शिताफीने पोलिसांनी त्या टेम्पोला पकडले. टेम्पोची झडती घेतली असता हौद्यामध्ये प्लास्टिकची व गोणपाटाची दहा पोती पोलिसांना दिसली. त्यामध्ये लाकडाचे बारीक बारीक तुकडे भरल्याचे दिसून आले. ते तुकडे नरक्या या औषधी वनस्पतीचे असल्याचे निदर्शनास येताच पोलिसांनी टेम्पोचालकासह अन्य एकाला तत्काळ ताब्यात घेतले.जप्त केलेला नरक्या प्लास्टिकच्या आठ पिशव्या व दोन गोणपाटांतून कोल्हापूर येथे विक्रीसाठी नेला जात होता. त्याठिकाणाहून तो मुंबईकडे नेला जाणार होता, अशी धक्कादायक माहिती भीमराव कांबळे याने दिली. आपल्याला फोनवरून हा नरक्या कागल व कोल्हापूर शहराच्यामध्ये हायवेवर घेऊन येण्यास सांगितले असल्याचे त्याने सांगितले. पोलिसांनी जप्त केलेला नरक्या अंदाजे २०० किलोहून अधिक आहे. या कारवाईमध्ये अधिकाऱ्यांबरोबर विशाल वाळेकर, हमीद शेख, एल. व्ही. धायगुडे, पोलीस कर्मचारी आवळकर, हुंबे, काशीद, संग्राम पाटील, कुंभार आदींनी भाग घेतला. मुरगूड पोलीस आरोपींकडून अधिक माहिती घेत आहेत. (वार्ताहर)