कोल्हापूर : दरवर्षी विद्यार्थी, प्राध्यापक, शिक्षकेतर कर्मचारी, तसेच विविध क्षेत्रातील मान्यवरांच्या उपस्थितीत, उत्साही, आनंदी वातावरणामध्ये दीक्षांत समारंभ होतो. विद्यापीठ कॅम्पस गर्दीने फुललेला असतो. मात्र, यंदा कोरोनाच्या वाढत्या प्रादुर्भावामुळे शिवाजी विद्यापीठाने पारंपरिक पध्दतीला छेद दिला. विद्यापीठाच्या इतिहासात पहिल्यांदाच ५७ वा दीक्षांत समारंभ मंगळवारी ऑनलाईन पध्दतीने घेण्यात आला. त्यामुळे दीक्षांत समारंभ असूनही मुख्य इमारत वगळता अन्य परिसरात शुकशुकाट पसरला होता. दीक्षांत विभागाकडून सर्व ७७,५४२ स्नातकांना पोस्टाद्वारे पदवी प्रमाणपत्र पाठविण्यात येणार आहे.
विद्यापीठात मंगळवारी सकाळी पावणेअकरा वाजता दीक्षांत मिरवणूक सुरू झाली. कुलगुरू कार्यालयापासून राजर्षी शाहू सभागृहामध्ये ही मिरवणूक आली. त्यामध्ये ‘ज्ञानदंड’ घेऊन परीक्षा मंडळाचे प्रभारी संचालक गजानन पळसे होते. यांसह कुलगुरू डॉ. डी. टी. शिर्के आणि अन्य अधिकारी, अधिष्ठाता होते. कोरोनाबाबतच्या नियमांचे पालन करून समारंभ पार पडला. त्याचे थेट प्रक्षेपण शिववार्ता यु ट्युब वाहिनीवरून करण्यात आले. हा कार्यक्रम ६९०६ जणांनी पाहिला.
दरम्यान, दरवर्षी विद्यापीठातील शिवपुतळा परिसर, दीक्षांत समारंभ सभागृह, परीक्षा भवन, ग्रंथालय परिसर आदी ठिकाणे विद्यार्थ्यांच्या गर्दीने फुलून जातात. पण कोरोनाची धास्ती आणि ऑनलाईन समारंभामुळे मंगळवारी या परिसरात शुकशुकाट पसरला होता.
चौकट
गौरवशाली विद्यापीठ
राष्ट्रीय, आंतरराष्ट्रीयस्तरीय संशोधनात सक्रिय असलेले शिवाजी विद्यापीठ गौरवशाली आहे, असे प्रा. सहस्त्रबुध्दे यांनी कौतुक केले. ‘नॅक’चे ए-प्लस प्लस मानांकन मिळवून विद्यापीठाने राष्ट्रीय पातळीवर गुणवत्ता सिध्द केल्याचे सांगत राज्यपाल भगतसिंह कोश्यारी आणि मंत्री उदय सामंत यांनी अभिनंदन केले.
फोटो (०६०४२०२१-कोल-शिवाजी विद्यापीठ दीक्षांत ०४,०५,०६, ०७) :
दरवर्षी दीक्षांत समारंभादिनी शिवाजी विद्यापीठाचा कॅम्पस गर्दीने फुलून जातो. यावर्षी मात्र, कोरोनाच्या पार्श्वभूमीवर मंगळवारी विद्यापीठाचा ५७ वा दीक्षांत समारंभ ऑनलाईन पध्दतीने झाला. त्यामुळे विद्यापीठ परिसरात शुकशुकाट दिसून आला. (छाया : नसीर अत्तार)
फोटो (०६०४२०२१-कोल-शिवाजी विद्यापीठ दीक्षांत ०८) : कोरोनाच्या पार्श्वभूमीवर मंगळवारी शिवाजी विद्यापीठाचा ५७ वा दीक्षांत समारंभ ऑनलाईन पध्दतीने झाला. त्याचे विद्यापीठाकडून थेट प्रेक्षपण करण्यात आले. (छाया : नसीर अत्तार)