वनविभागाच्या पथकास गवा सापडेना

हेरवाडमधील गवा तेरवाडकडे : अपुऱ्या साहित्यामुळे ग्रामस्थामध्ये संताप

कुरुंदवाड : हेरवाड (ता. शिरोळ) येथील भरवस्तीत आलेल्या गव्याला पकडण्यात वनरक्षक पथकाला अपयश आले. रात्रभर पहारा ठेवूनही गवा दृष्टीस पडला नाही. मात्र, सकाळी गवा तेरवाड मार्गे परतला असल्याचा दावा या पथकाने केला आहे. त्यामुळे हेरवाडकरांनी सुटकेचा नि:श्वास सोडला असला, तरी तेरवाड, कुरुंदवाड, शिरढोण ग्रामस्थांतून भीती व्यक्तकेली जात आहे. दरम्यान, गव्याला पकडून जंगलात सोडण्यासाठी आलेल्या पथकाकडे कोणतेही साधन नसल्याने ग्रामस्थांतून तीव्र संताप व्यक्त होत आहे.मंगळवारी येथील भरवस्तीत असलेल्या शेळके यांच्या ऊस शेतामध्ये गवा ग्रामस्थांच्या नजरेस पडल्याने ग्रामस्थांतून भीती व्यक्त होत होती. सामाजिक कार्यकर्ते बंडू पाटील यांनी गावात गवा आल्याची माहिती वनविभागाला कळविल्याने दुपारी वनपरिक्षेत्र अधिकारी ए. बी. निंबाळकर यांच्या मार्गदर्शनाखाली वनपाल आर. बी. पताडे, आर. बी. मोरे, एम. एस. राऊत, एन. एस. नायकवडे, एस. डी. ढेरे यांचे पथक दाखल झाले. अंधार पडल्यानंतर गवा परतीसाठी बाहेर येतो त्यावेळी पकडणे अथवा हुसकावून लावण्यासाठी पथकाने रात्रीची मोहीम आखली. मात्र, मोहीम राबविण्यासाठी पथकाकडे कोणतेच साधन नाही. अखेर बंडू पाटील, बंडू बरगाले, प्रकाश पाटील, जयगोंडा पाटील, आदींनी बॅटरी, दोरी, आदी साहित्य उपलब्ध करून गव्याचा शोध घेण्यासाठी स्वत:च उतरले. त्यामुळे पथकाच्या उपयोग काय? असा सवाल उपस्थित करत ग्रामस्थांतून संताप व्यक्त होत आहे.गवा लपून बसलेल्या ऊस पिकाभोवती रात्रभर पहारा करण्यात आला. मात्र, गवा दृष्टीस न पडल्याने पथकाने सकाळी घोसरवाड, टाकळी, टाकळीवाडी, दत्तवाड भागात पाहणी केली. यावेळी तेरवाड येथे गव्याच्या पायाचे ठसे दिसल्याने गवा परतल्याचे पथकाने जाहीर केले. गवा पकडण्यासाठी आलेल्या पथकाला गवा दृष्टीसही न पडल्याने ग्रामस्थांतून आश्चर्य व्यक्त होत आहे. गव्याने जागा सोडल्याने हेरवाडकरांनी सुटकेचा नि:श्वास सोडला असला तरी तेरवाड, शिरढोण, कुरुंदवाड ग्रामस्थांतून भीती व्यक्त होत आहे. (वार्ताहर)